Footer

Agina, dinungpar ti Isuzu Elf; ubing pimmusay iti ospital

STA. MARIA, Ilocos Sur – Pimmusay bayat ti pannakatamingna iti ospital ti ubing a naaksidente, kaduana ti inana , sadiay Barangay Suso ditoy nga ili idi sardam ti Mayo 27.

Pimmusay ni Ellain Derige y Sardual, 2, iti Sto. Niño Hospital, Sta. Maria, Ilocos Sur, a nakaitarayanda nga agina kalpasan a nadungpar ida ti Isuzu Elf truck iti national highway a sakup ti Barangay Suso idi agarup 6:15 ti sardam ti nadakamat a petsa.

Segun iti inisial a panagimbestiga dagiti polis, agpaabagatan ti Isuzu Elf truck a minaneho ni Mauro Rosal y Abobo, 57, naasawaan, residente iti Catablan, Urdaneta City, Pangasinan idi mapapati a kellaat a bimmallasiw ni Ellaine idinto nga adda iti bangir nga abaga ti kalsada ti inana a ni Ruby, 26.

Kinamakam ni Ruby ti anakna ngem naladawen ket agpadada a dinungpar ti Isuzu Elf a nagsagrapanda kadagiti dunor iti nadumaduma a paset ti bagida.

Naitaray ni Ruby iti Reyes Clinic and Hospital, Sta. Maria, Ilocos Sur idinto nga iti Sto. Niño Hospital ni Ellaine a pimmusayanna.#

Comments are closed.