Footer

BANNER: 4 nagkikil, napalab-ogan iti entrapment operation

VIGAN CITY – Uppat a lalaki a pakaibilangan ti tallo a menor de edad a naireklamo iti panagkikil ti nanabtuog iti entrapment operation nga inwayat ti kapolisan ditoy idi malem ti Mayo 26.

Tiniliw dagiti polis babaen ti entrapment operation da Reynalin Obrero Calub, 25, awanan asawa; Belinda Espiritu Obrero, 15, grade 11; Leynard Obrero Calub, 15, grade 10; ken Abel Espiritu Obrero, 15, residenteda amin iti Barangay Ayusan Norte, Vigan City.

Narekobre iti ikut ni Leynard Obrero Calub ti Iphone 6 nga immun-una nga inreport ti akinkukua a ni Justine Quitoriano, 20, awanan asawa ken residente iti Brgy. Callaguip, Caoayan, Ilocos Sur a natakaw iti compartment ti motorsiklona a Yamaha Mio Sporty idi agarup tengnga ti aldaw ti Mayo 26 sadiay Plaza Maestro, Barangay 1, Vigan City.

Narekobre pay ti sim card ti natakaw nga Iphone 6 iti LG cellular phone ni Reynalin Obrero Calub.

Segun iti polis, adda pay laeng a nakarekord iti sim card dagiti messages mainaig iti transaksion ti panagkikil nga inwayat dagiti suspek ken ni Justine.

Immun-una ngem daytoy, inreport ni Quitoriano a natakaw ti agbalor iti P25,000.00 a selponna nga Iphone 6 a naikabil iti compartment ti Yamaha Mio Sporty a motorsiklona nga imparkingna iti Plaza Maestro, Barangay 1, ditoy siudad idi agarup 12:00 ti malem ti Mayo 26.

Ngem idi agarup alas 4:00 iti dayta met la a malem, kinuna ni Quitoriano a nakaawat ti gayyemna a ni Marie Paet Posadas iti text message a naaramat ti sim card ti natakaw a selponna ket dinawatan ti nagtext iti P7,000.00 kas sukat ti selponna.

Nagpatulong ni Quitoriano iti polis ti Vigan ket nangiwayat dagitoy iti entrapment operation iti kalsada iti Mira Hills, Barangay VII a naitulag a pagsasarakan para iti panagiinnallawat iti kuarta ken selpon.

Inaresto dagiti polis dagiti suspek kalpasan a narekobre iti ikut ni Leynard ti Iphone 6 ken ti sim card iti selpon ni Reynalin.

Iti pannakaisurat daytoy, nakakustodia ni Reynalin idinto a naipaima dagiti menor de edad iti Vigan City Social Welfare and Development. (Tawid News)

Comments are closed.