Footer

Barangay kagawad, pinaltogan armado a lalaki a nagkalubbon iti motorsiklo

SINAIT, Ilocos Sur – Saan pay nga ammo ti motibo ken ti kinaasino ti nangpaltog iti maysa a barangay kagawad ti Barangay Pacis ditoy nga ili idi malem ti Mayo 30.

Iti report manipud iti kapolisan ditoy, pinaltogan dagiti nakasakay iti motorsiklo ni Barangay Kagawad Mariano Impelido, Jr. y Villa, 48, bayat ti panagdaliasatna nga aggawid iti kalsada a sakup ti Barangay Jordan idi agarup 3:21 ti malem ti nadakamat a petsa.

Mapapati a sinurot dagiti di nabigbig a suspek ni Impelido idi aggawid a nakalugan iti MXC 125 a motorsiklona ket pinaltoganda ti biktima iti sumagmamano a beses a nakatiruan ti nadumaduma a paset ti bagi daytoy.

Intaray ni Ferdinand Ines, Sr. y Reyes, 64, mannalon, ken residente met laeng iti Barangay Pacis ti kagawad iti Corpuz Clinic and Hospital.

Naiyalis ti biktima iti Don Mariano Marcos Memorial Hospital and Medical Center, Batac City para iti naan-anay a pannakaagasna.

Nakarekobre dagiti inbestigador iti uppat a kapsula a mapapati a nagtaud iti cal. 45 iti crime scene.

Agtultuloy ti panagimbestiga dagiti polis mainaig iti nasao a pammaltog. (Tawid News)