Footer

Ruk-atan Ilocos 6: ralista a tobacco farmers

LAOAG CITY – Nagrali itay Hunio 2 dagiti mannalon nga agmulmula iti tabako kas suportada ken ni Governor Imee Marcos ken kadagiti innem nga empleado ti gobierno probinsial ti Ilocos Norte a nadetene iti House of Representatives bayat ti kaudian a congressional hearing idi Mayo 29 mainaig iti pannakaaramat ti bingay ti probinsia iti tobacco excise tax wenno RA 7171.

“Release the Ilocos 6!” “Mahalaga sa amin ang multicab na ito,” ken “Sinusuportahan namin si Gov. Imee Marcos,” sumagmamano laeng dagitoy dagiti nailanad kadagiti plakard nga iggem dagiti mannalon bayat ti panagralida iti nadumaduma a paset ti probinsia manipud iti Badoc Gateway agingga iti provincial capitol ditoy siudad.

Sinarabo pay dagiti mannalon babaen ti plakard dagiti diputado a kimmuyog iti House of Representatives North Luzon Inspection Trip iti isasangpetda ditoy siudad iti daytoy nga aldaw.

“Boluntario nga immaykami ditoy tapno ipakitami ti panangsuportami iti ingungotentayo a Gobernadora,” kinuna ni Rogelio Ceredon, presidente ti Dingras Municipal Agriculture and Fisheries Council (MAFC).

Idi masaludsod maipapan iti maisaysayangkat a panagpalutpot iti House of Representatives mainaig iti pannakagatang dagiti behikulo a nagtaud ti pondo manipud iti bingay ti probinsia iti tobacco excise tax, kinuna ni Ceredon: “Ti panagkitami, naitungpal met dagita a naibunong para iti pagsayaatantayo (mannalon).”

Maipalagip nga inangay ti House Committee on Good Government and Public Accountability ti hearing iti House Resolution No. 882 a pinutar da House Majority Floor Leader Rodolfo Fariñas, Diputado Juan Pablo Bondoc ken Diputado Johnny Pimentel mainaig iti pannakagatang kadagiti motor vehicles nga aggatad iti P66.45 million a nagtaud manipud iti bingay ti probinsia ti Ilocos Norte iti tobacco escise tax wenno RA 7171.

Alegasion ni Fariñas nga inotorisar ni Governor Imee Marcos ti pannakagatang ti 115 assorted motor vehicles idi 2011 ken 2012 nga awan ti naisayangkat a public bidding ken naruk-atan dagiti pondo babaen ti cash advance a panagsalungasing iti procurement law ken ti auditing code.

Ngem kinuna ni Marcos a nasurot amin nga aplikable a linteg ken mandato a government procurement ken bidding procedures iti pannakagatang dagiti behikulo, ken otorisado ti Sangguniang Panlalawigan.

Kinuna pay ni Marcos a naipababaen ti purchases iti umisu nga audit ken post-audit examinations babaen ti Commission on Audit ket awan ti nasarakan nga iregularidad dagiti transaksion.

Kabayatanna, nangipila iti petision para iti pannakaiparuar ti writ of habeas corpus iti Court of Appeals dagiti abogado dagiti innem nga empleado ti gobierno probinsial ti Ilocos Norte a dinetene ti House Committee on Good Governance idi Mayo 29.

Kinuna ni Atty. Da Vince Crisostomo, maysa kadagiti abogado dagiti nadetene nga empleado, ken maysa pay a kameng ti Sangguniang Panlalawigan ti Ilocos Norte, a maysa a kiddaw ti petision iti Sergeant-at-Arms ti House of Representatives a kuyogenna dagiti empleado iti Korte ken ipalawagna ti base ti desision ti komite a nangdetene kadagitoy.

Maipalagip a napatawan dagiti innem nga empleado iti contempt ken nadeteneda gapu iti “saanda a panagsungbat kadagiti sinaludsod ni Fariñas mainaig kadagiti purchases a naibasar iti photocopied documents.

Ngem kinuna ni Crisostomo: “Citing them in contempt and issuing a detainment order was not right. One ground for contempt [at the House] is ‘refusal to answer any question,’ but we saw in the [hearing] transcript and we heard that all they asked of them were answered.” (Tawid News, with report from PGIN)