Footer

MP-Ilocos Norte, nangipasa resolusion kas suporta iti “Ilocos 6”

LAOAG CITY – Maysa a resolusion ti impasa ti League of Municipalities in the Philippines (LMP) – Ilocos Norte a nangidarirag iti pannakaruk-at dagiti innem nga empleado a nadetene iti House of Representatives sipud pay idi Mayo 29.

Indagadag ti resolusion ti pannakaruk-at ti “Ilocos 6” gapu iti “humanitarian a reason” agsipud iti “pannakataktak dagiti nasken a trabaho iti inaldaw gapu iti kaawan dagiti indibidual a nakatugaw kadagiti sensitibo a posision ti gobierno probinsial”.

Kinuna ni Dingras Mayor Erdio E. Valenzuela a taktak iti pannakaipaay dagiti serbisio ti pannakadetene dagiti empleado, a kaaduanna kadakuada ti miembro iti Local Finance Committee (LFC).

Kabayatanna, saan manen a nagparang iti Court of Appeals ni House of Representatives Sergeant-at-Arms Lt. Gen. Roland M. Detabali (ret.) tapno ipresentarna dagiti innem a nakadetene nga empleado iti hearing a naangay itay Hunio 9.

Sakbayna, binallaagan ti korte ni Detabali a mapatawan iti contempt of court no mapaay manen a mangipresentar kadagiti “Ilocos 6” kalpasan a pinalugodanna ti petision nga impila da Estelito Mendoza ken ni Butch Catubay idi Hunio 1 para iti pannakaiyisio ti writ of habeas corpus.

Kanaig daytoy, kinuna ni Catubay nga ikonkonsidera dagiti empleado ti mangipila iti kriminal a kaso maikontra kadagiti House officials a nangiwayat iti “nadawel, opresibo, ken koersibo nga interogasion maikontra kadakuada a maysa a panaglabsing iti Anti-Torture Law”.

Maipalagip a nadetene dagiti innem nga empleado iti House of Representatives sipud pay idi Mayo 29 maigapu iti mapapati a panagkitakitda a mangsungbat kadagiti saludsod mainaig kadagiti behikulo a ginatang ti gobierno probinsial nga aggatad iti P66.45 million para kadagiti mannalon a nagtaud ti pondoda manipud iti bingay ti probinsia iti excise tax ti tabako wenno RA 7171.

Alegasion ni Fariñas nga inotorisar ni Governor Imee Marcos ti pannakagatang ti 115 assorted motor vehicles idi 2011 ken 2012 nga awan ti naisayangkat a public bidding ken naruk-atan dagiti pondo babaen ti cash advance a panagsalungasing iti procurement law ken ti auditing code.

Ngem kinuna ni Marcos a nasurot amin nga aplikable a linteg ken mandato a government procurement ken bidding procedures iti pannakagatang dagiti behikulo, ken otorisado ti Sangguniang Panlalawigan.

Kinuna pay ni Marcos a naipababaen ti purchases iti umisu nga audit ken post-audit examinations babaen ti Commission on Audit ket awan ti nasarakan nga iregularidad dagiti transaksion.

Kinondenar pay ni Marcos ti pannakadetene dagiti empleado ti gobierno probinsial ti Ilocos Norte kas “nasapa a panagpolitika” idinto nga indariragna ti pannakailisi koma dagiti ordinario nga empleado iti “naipanurok a pannakaaramat iti bileg”. (Tawid News/Karaman ti report ti PGIN, CMO)

Comments are closed.