Footer

3 mangngalap nadundunor iti panagbettak bongbong

SINAIT, Ilocos Sur – Tallo a mangngalap ti nayospital gapu iti panagbettak ti sinindianda a bongbong bayat ti panagkalapda iti kabaybayan a sakup daytoy nga ili idi agsapa ti Hunio 15.

Naitaray iti Corpuz Clinic and Hospital tapno maagasan da Danilo Ancheta y Vitacion, 31, baro; Ian Mark Dangcil y Peralta, 27, naasawaan; ken Mariano Quitog y Vitacion, 39, agnaedda amin iti Barangay Teppeng ditoy nga ili.

Dua kadagiti biktima, da Ancheta ken Dangcil ti naiyalis iti Gabriela Silang General Hospital gapu ta nakaro dagiti sugatda.

Saan a naan-ano ni Jerson Torallde, 23, baro, a kadua dagiti biktima a timmapog tapno agkalap iti baybay iti dayta nga agsapa.

Kabayatan ti kaaddada iti taaw, mapapati a sinindian ni Ancheta ti pabelo ti bongbong ngem kellaat a bimtak daytoy nga iggemna a nakaburboran ti imana ken nakadundunoran ti nadumaduma a paset ti bagina. Nasugatan met ti mata ni Dangcil a nakabulsekanna.

Nakaro ti dadael ti naglugananda a bangka.#

Comments are closed.