Footer

DAGITI ADAL ITI RESORT WORLD MANILA TRAGEDY

Komentario Ni Eden A. Alviar

NAKAAM-AMES ti napasamak a trahedia sadiay Resort World Manila a nakatayan ti 38 a tattao pakairamanan ni Jessie Javier Carlos, ti agmaymaysa a nagtagiarmas a nagaramid ti terorismo, ken dagiti 37 nga agserserbi ken bisita iti hotel ken casino.

Idi agtengnga ti rabii ti Hunio 2, 2017, simrek ti nakamangisit ken nakaboniti a lalaki ken armado iti M4 Carbine iti casino a nabigbig kalpasan ti insidente a ni Carlos. Imputokputokna ti paltogna iti ngato. Pinuoranna dagiti lamisaan a pagsusugalan. Idi nagkaribuso dagiti tattao, sinerrekna ti siled dagiti chips ket nagala iti P113 milion ti pategna. Mapapati a pumanaw koman iti pasdek ngem adda nakapinnaltogna idi bumaban iti agdan a nakasugatanna. Naglemmeng iti Room 510 iti hotel ket sadiay a pinuoran ken pinaltoganna ti bagina a nakatayanna.

Idi marekobre iti bangkay ni Carlos, natakuatan a binungonna ti bagina iti ules a nasibugan ti gasolina. Narekobre pay ti napuoran a paltogna nga M4 Carbine ken Pistol Caliber .380.

Kabayatan ti trahedia sadiay Resort World Manila idi saan pay a nabigbig ti gun man, dagus nga inaklon ti Islamic State of Iraq and Syria nga isuda ti akingapuanan dayta a pagteng. Uray ni United States President Donald Trump ket inyanunsiona ti terorismo iti Metro.Manila. Nagdanag dagiti agindeg iti Metro Manila nangruna dagiti adda iti service industry ta naigiddan dayta iti riribuk sadiay Marawi City ken naideklarar ti Martial Law sadiay Mindanao. Dagus met a kinontra dayta da Philippine National Police Director General Ronald de la Rosa ken National Capital Region Police Office Director Oscar Albayalde, ket impettengda a saan nga aramid dayta ti organisado a terorista ta agmaymaysa ti gun man ken puro ngato ti panagputokna.

Maibasar iti imbestigasion ti PNP ken ti Committee on Tourism ti House of Representatives, nadaras ti iseserrek ni Carlos iti pasdek ta awan ti naaramidan ti lady guard nga awanan-armas a nangsitar kenkuana. Nagkakaribuso dagiti agpapaay ken bisita iti casino ken hotel idi imputokputok ni Carlos ti paltogna. Iti pannakakarintar dagiti tattao iti pasdek, adu dagiti saan a nakasurot kadagiti dalan a rummuaran ken fire exit. Dagiti 37 a natay ket gapu iti suffocation wenno naangsan iti nakaro nga asuk a pinarnuay ti uram.

Naamuan a nadaras a nakapagresponde dagiti polis iti Resort World Manila, ngem saanda a natunton ti ayan ti gun man gapu ta saanda a naserrek ti siled nga ayan dagiti closed-circuit television ta napnon iti asuk. Naladawen idi naammuanda nga adda pay sabali a CCTV room iti kaabayna a pasdek. Naduktalan pay a nakissayan ti bilang dagiti private guards ti establisimiento idi sumrek ti gun man ta agtengngan iti rabii, ken nagamak dagiti guardia a nanglapped kenkuana.

Segun pay iti report, ni Carlos ket sigud a high roller player iti casino ngem kiniddaw ti pamiliana iti Philippine Amusement and Gaming Corporation a ma-ban wenno saanen a mapastrek iti amin a casino establishment gapu ta naapiangen iti sugal ket naipaabaknan dagiti adu a sanikuada nga agassawa ken nailumluomen iti utang. Naammuan pay a ni Carlos ket sigud a tax specialist ti Department of Finance, ngem pinaikkat ti Ombudsman gapu ti saan a nakapappapati nga indeklarana nga assets iti Statement of Assets and Liabilities-na. Nairakurak pay nga adda negosioda nga agassawa kas gun dealer. Gapu iti nalabes a panagsugalna, nagsinadan nga agassawa.

Kalpasan ti trahedia, dimmawat dagiti nagannak ni Carlos iti pammakawan kadagiti pamilia dagiti biktima. Dagus met a nangipaay ti tulong ti management ti Resort Wprld Manila a P1 million iti kada biktima. Impalgak metten dagiti pamilia dagiti biktima a mangipilada iti maymaysa a kaso kontra iti management ta patienda nga adda panagbaybay-a ken sungsungbatan ti kompania iti napasamak a trahedia.

Nakalkaldaang dayta a trahedia iti Resort World Manila ta no sukimaten ti nauneg a gapuna ket ti pannakaidagel ni Carlos, iti bisio a sugal ti puon ti panagaramidna iti krimen. Patien dagiti imbestigador a mabalin a mapan laeng ngata agtakaw iti chips ti gagara ni Carlos, ngem saanen a nasurot ti planona idi adda nakapinnaltogna idi umulog iti agdan ken rummuar koman iti pasdek.

Ti trahedia sadiay Resort World Manila ket iyanninawna ti kinakapuy ti kabaelan dagiti pribado a guardia ken dagiti agserserbi kadagiti establisimiento a daydaywen dagiti adu a turista ken casino player a nanglapped iti agmaymaysa nga armado a tao a nangisaknap iti krimen.

Dayta a pagteng ket ipaneknekna pay ti panagkurang dagiti polis a nadaras a nangtunton ken nangpasardeng ti agmaymaysa a gun man ta napalabas pay ti agpatnag ken natayen ni Carlos idi masukalan ti siled a nagpakamatayanna. Iyanninaw pay daytoy ti panagkamtud dagiti agpapaay dagiti ahensia ti PNP a Supervisory Office for Security and Investigation Agencies ken Firearms and Explosives Office. Iparangna pay ti nagkurangan dagiti rescue units nangruna dagiti agpapaay iti Bureau of Fire Protections ta adu dagiti natay uray saan unay a nakaro ti uram.

Dayta a trahedia ipakitana ti dakes nga epekto ti sugal nangruna kadagiti dadakkel ti pustana kas iti casino. Segun kadagiti report, P40,000 ti kababaan a panagpusta ni Carlos. Ipaneknek dayta ti kinapudno nga adu a Pilipino dagiti naapiangen iti sugal a saandan a kabaelan a kontrolen ti panagduyosda nga agsugal uray no ilakoda dagiti sanikua a nagrigrigatanda nga ipundar, ken mailumlomda iti utang, wenno iduronna ida nga agtakaw wenno agaramid iti krimen tapno laeng adda ipustada.

Maysa ti PAGCOR kadagiti kadagiti kangrunaan nga agpaspastrek iti pondo ken ingreso a mausar kadagiti nagduduma a programa ti gobierno. Sabali pay dagiti adu a klase ti lotto ken sweepstakes nga imanmanehar ti Philippine Charity Sweepstakes Office. Saan laeng a dagiti casino a naisangrat kadagiti turista ken babaknang a Pilipino, ken lotto outlets ti umad-adu a maipatakder kadagiti nagduduma a paset ti pagilian. Nagraira met dagiti galiera wenno pallotan. Nagsaknap pay dagiti hueteng, dado ken dadduma pay a sugal.

Ti nakaam-ames a trahedia sadiay Resort World Manila, ipalagipna kadagiti Pilipino, nga awan ti nasayaat nga ibunga ti nalabes a panagsugal.#

Comments are closed.