Footer

Katulagan para pannakarehabilitar duog a torre a pagwanawanan, naanamongan

NARVACAN, Ilocos Sur – Umanamong ti akindaga a nakaipatakderan ti 100-tawenna a torre a pagwanawanan a sumrek iti katulagan iti gobierno probinsial para iti pannakarehabilitar ken pannakapapintas daytoy kas pagpasiaran dagiti turista.

Immannugot ti pamilia Canosa a sumrekda iti memorandum of agreement iti gobierno probinsial para iti rehabilitasion iti watchtower ken iti pannakapadur-asna a kas pagpasiaran dagiti turista.

Kinuna ni Michael Canosa nga awan ti problema kadakuada mainaig iti panggep ti gobierno probinsial a mangrehabilitar iti watchtower agsipud ta dakkel ti maitulong ti proyekto iti panagbiagda gapu iti manamnama a yaadu dagiti turista nga agpasiar iti lugarda.

Binisita itay nabiit dagiti miembro ti Committee on Living Treasures and Industrial Development ti nakaipatakderan ti watchtower sadiay Barangay Sulvec ditoy nga ili ken nakipatangda iti pamilia Canosa mainaig iti panggep ti gobierno probinsial a mangrehabilitar iti nadakamat a watchtower sadiay Barangay Sulvec ditoy nga ili ken ti pannakalukatna iti publiko a kas tourist spot.

Kinuna ni Board Member ti 2nd District ti Ilocos Sur Virginia Cordero-Pe Benito a binisitada ti watchtower tapno makitada a mismo no ania ti maaramid tapno mapreserba daytoy para iti sumaruno a henerasion ken kas pammigbig iti daytoy a kas paset ti historiada.

Kinuna met ni Board Member ti First District Efren Rafanan, Sr. a babaen iti iseserrekda iti katulagan iti pamilia Canosa, mapalubosan ti gobierno probinsial a mangrehabilitar iti watchtower ken mapadur-as daytoy a lugar para iti publiko ken turista agsipud ta tumulong dayhtoy iti industria ti turismo ken iti pannakaitandudo ti kultura ken historia ni Ilokano.

Saan unay a maad-adakan ti lugar a nakaipatakderan ti watchtower agsipud ta pinaaladan ti akinkukua ti aglawlaw daytoy gapu iti panangtikap dagiti souvenir hunters kadagiti teha manipud iti istruktura.

Maysa kadagiti kondision ti pamilia Canosa iti iseserrekda iti MOA ti panagpaay ti maysa a miembro ti pamilia a kas caretaker ti watchtower.

Maipalagip nga iti kallabes, kuinestionaran ti gobierno munisipal ti Narvacan ti panagtagikua ti pamilia Canosa iti daga a nakaipatakderan ti watchtower. Nupay kasta, pinaboran ti korte ti pamilia Canosa.

Maysa ti watchtower iti Narvacan kadagiti tallo a pagwanawanan a pinatakder dagiti Espaniol iti Ilocos Sur. Masarakan dagiti dua pay iti ili ti San Esteban ken Santiago.

Nabangon dagitoy a watchtower kas pagwanawanan tapno mapakdaaran dagiti lumugar iti iseserrek dagiti pirata nga aggapu iti South China Sea. (Tawid News)