Footer

Lalaki, timmapuak iti rangtay, nalmes

SANTA, Ilocos Sur – Mapapati a problema iti pamilia ti nakagapu iti timmapuakan ti maysa a lalaki iti daan a Quirino bridge idi aldaw ti Hunio 11.

Ngem iti panagimbestiga dagiti polis, nabartek ni Allan Ortega y Dalapag, 37, naasawaan, ken residente iti Barangay Naguiddayan, Bantay, Ilocos Sur idi timmapuak iti rangtay.

Sakbay ti nasao nga insidente, naggiinom da Ortega ken maysa a di nainaganan a kaduana iti balay ti gayyemda sadiay Barangay San Mariano, Bantay, Ilocos Sur agingga iti nabartekda.

Idi naggawidda, dimmagas dagiti dua iti daan a rangtay ket bayat ti kaaddada ditoy, mapapati a timmapuak lattan ni Ortega.

Iti search and retrieval operation nga inwayat dagiti kameng ti PDRRMO ken mdrrmc ti Bantay ken Santa, nasarakanda ti bangkay ti biktima iti agarup 1:18 ti malem iti dayta met la a petsa.

Segun iti report, ti kaawan ti komunikasion iti nagbaetan ti biktima ken ti asawana nga agtrabtrabaho iti abroad a dinegdegan ti pannakabartekna ti mapapati a timmapuakanna iti rangtay.#

Comments are closed.