Footer

Panagtakaw iti Comelec office, 3 menor de edad nangiwayat

MAGSINGAL, Ilocos Sur – Awan ti palimed, nangruna no mainaig iti krimen, ti di maibutaktak. Addanto latta panawen a lumtuad ti pudno.

Napaneknekan ti kinapudno daytoy idi tallo a menor de edad ti nangannugot bayat ti panagpalutpot dagiti polis nga isuda ti nangserrek iti opisina ti Commission on Elections sada kinnan dagiti makan a linaon ti refrigerator idi rabii ti Hunio 6.

Sakbayna, naipan iti police station da John, Mark ken Stan (saan a pudno a naganda agsipud ta menor de edadda) gapu iti panagsalungasingda iti curfew hour.

Nasalamaan dagiti agpatpatrolia a polis nga adda pay la dagiti tallo a menor de edad nga agwarangwarang iti kalsada idinto a pasadon 10:00 ti rabii ket naipanda iti police station.

Ngem bayat ti panagsalsaludsod dagiti polis, inadmitir dagiti menor de edad nga isuda ti simrek iti opisina ti Comelec sada kinnan dagiti nakadulin a makan iti refrigerator.

Segun kadagiti suspek, puersado a linuktanda ti ridaw ti Comelec iti iseserrekda iti uneg.

Gapu itoy, naipaima dagiti menor de edad ken ni MSWDO Shirley Tiri tapno maangay ti dialogo iti nagbaetan dagiti nagannak ken ti hepe ti Comelec ti munisipio mainaig iti naaramid a babak dagiti suspek.#

Comments are closed.