Footer

Pimmaltog a polis, nakasuan iti murder

VIGAN CITY – Saanen a homisidio no di murder ti naikaso iti maysa a retirado a polis a pimmaltog iti maysa a baro sadiay Barangay Fatima ditoy siudad idi nabiit.

Pimmusay ni Sherwin Cabbat Cruz, 48, natibo iti Lingsat, Sta. Maria, Ilocos Sur ngem agnaeden iti Barangay Pantay Daya, ditoy siudad idi agarup 11:20 ti rabii ti Hunio 10 bayat ti pannakataming ti sugatna iti Saint James Hospital.

Maipalagip a pinaltogan ti maysa a Nestor Amin Amigable, 52, naasawaan, retirado a polis ken residente ti nadakamat a barangay ni Cabbat idi agarup 6:00 ti sardam ti nadakamat a petsa iti asideg a mismo ti balay ti suspek a nagsagrapan ti biktima iti sugat iti ulona a puon ti nakatayanna.

Idi damo, homisidio laeng ti naisaklang a kaso ni Amin ngem napagbalin a murder ken panagsalungasing iti RA 10591 idi naiyendorso iti city prosecutor’s office, Vigan City.

Kas maibatay iti panagimbestiga dagiti polis, sakbay ti pammaltog, idi pasado alas singko ti malem ti nadakamat a petsa, napan insubli ni Cabbat ti traysikel nga ipaspasadana iti akinkukua a kaarruba ni Amin.

Bayat ti pannagna ni Cabbat nga agturong iti nakaiparkingan ti bisikletana, mapapati a kellaat a nagparang ti suspek sana pinaltogan ti ulo ti biktima.

Iti panangproseso ti Scene of the Crime Operatives (SOCO) Crime Laboratory Office babaen ti tulong ti KIMAT iti nakapasamakan ti krimen, nakarekobreda iti maysa a naiputok a kapsula manipud iti kalibre 9mm.

Nangiwayat ti nagtipon nga elemento ti Vigan City police station, PIB Ilocos Sur, IDMB ken ISPPSC/SWAT iti hot pursuit operation maikontra iti suspek a nagresulta iti pannakatiliw daytoy iti bisinidad ti balayna.

Kalpasan ti pannakaiwayat ti medico legal examination iti suspek iti Gabriela Silang General Hospital, naikustodia iti police station ti Vigan City para iti dokumentasion ken umisu a disposision.

Awan ti nailanad iti journal a nakagapu iti panangpaltog ni Amin ken Cabbat ngem agtultuloy ti panagimbestiga dagiti polis mainaig iti nadakamat a pammapatay. (Tawid News)