Footer

2-tawenna nga ubing, nakoriente, natay

BURGOS, Ilocos Sur – Nagsapa pay ngem madama nga agay-ay-ayam daytoy dua- ti-tawenna nga ubing iti igid ti kalsada sadiay Barangay Lucaban, Burgos, Ilocos Sur idi makoriente a puon ti nakatayanna.

Segun iti maysa a Juan Dumalanta, 64, naasawaan, empleado ti munisipio ditoy nga ili, ken residente iti Macaoayan, Burgos, Ilocos Sur, napasamak ti insidente idi agarup 6:30 ti agsapa bayat ti panagay-ayam ti apona a ni Dan Abraham Abalos III y Gasmen iti igid ti kalsada ti barangay.

Mapapati nga aksidente a naiggaman ti ubing ti poste ti silaw ti kalsada ket nakoriente.

Naitaray ti biktima iti Reyes Clinic and Hospital, Sta. Maria, ngem saanen a naidanon a sibibiag.

Nakikoordinar dagiti polis iti barangay electrician para iti pannakatarimaan ti linia ti koriente iti poste tapno saanen a maulit pay ti napasamak.#