Footer

3 lugan, nagsasaruno a nabato

NARVACAN, Ilocos Sur – Narugian manen ti pannakabato dagiti lugan nga agdaldaliasat iti national highway iti rabii.

Idi sardam ti Abril 21, nagreport iti police station ti Santiago, Ilocos Sur ni Valerio-Elvis Ugerio y Jungco, residente iti Barangay Bungro, Magsingal, Ilocos Sur a nabato ti minanehona nga Isuzu Giga Wing van truck bayat ti panagdaliasatna iti Barangay Cabugao, partikular iti asideg ti Banayoyo Junction a nakabuongan ti windshield ken nakakuppilan ti makannigid a paset ti hood ti luganna.

Nabato met idi agarup 10:25 ti rabii iti daytoy met la a petsa ti maysa a Mitshubishi Fuso truck (aluminum closed van) a minaneho ni Arnel Gasion y Castelo, 36, naasawaan, ken residente iti Barangay Ibao Este, Calumpit, Bulacan iti national highway iti bisinidad ti Barangay Napo, Magsingal, Ilocos Sur partikular ti maar-aramid a rangtay a nakabuongan ti windshield daytoy.

Idi agarup 3:15 ti parbangon ti Hunio 12, inreport ni Alvic Vital y Vergara, 30, naasawaan, ken residente iti Pandan Anupul, Bamban, Tarlac, iti police station ti Narvacan, Ilocos Sur a nabato ti cargo van truck a minanehona bayat ti panagdaliasatna iti national highway iti bisinidad ti Barangay San Jose, Narvacan, Ilocos Sur a nakabuongan met ti akinsango a windshield ti lugan.

Nupay kasta, awan ti naireport a nadangran kadagiti naglugan kadagiti nasao a lugan.

Segun ken ni Ugerio, tallo a bato ti imbansag dagiti dua a lalaki a naglugan iti motorsiklo. Naglibas dagiti di nabigbig suspek iti abagatan a direksion.

Saan met a nabigbig da Gasion ken dagiti kaduana a Ron Ron Joson y Esguerra, 18, baro, helper and residente iti Barangay Corazon, Calumpit Bulacan ken Reniel Dela Cruz y Caparas, 30, baro, helper ken residente iti Panasahan, Malolos Bulacan, dagiti dua a lalaki a naglibas a nagpaabagatan a direksion kalpasan ti panangbatoda iti lugan.

Iti pulong ni Vital iti polis ti Narvacan, tallo a lalaki ti nangbato iti luganna sada naglibas a nagturong iti daan a kalsada nasional iti nadakamat met laeng a barangay.

Iti pannakaisurat daytoy, awan pay ti natiliw a suspek a nangisayangkat kadagiti panagubor. (Tawid News)

Comments are closed.