Footer

SINURSURAN: Iti Panagsanay a Dinar-ayanna

Kolum ni Jobert M. Pacnis

(Maudi iti dua a paset)

Yanna nga adat, isu metten ti pannakaipakaammo kenkuana a maibaon iti training. Yanna pay nga adat manen, saanna a suheto dayta mapanna i-training. Adda kano napateg a rason ti akin-subject isu a di makapan.

Comply before you complain, isu a sige, wen, lattan.

Ket iti idadar-ayna iti nasao a training, a damona sipud pay narugian dagitoy a programa para iti K to 12, adu dagiti nadlawanna.

Saan a nagun-uni idi damona. Natda laeng a nagpalpaliiw aglalo ket regional ti nasao a training. Naggapu dagiti padana a mannursuro iti sibubukel a Rehion Dos. Kinapudnona, adda pay dagiti taga-Batanes tapno laeng makasakdoda kadagiti baro nga adal. Numona ta baro ti linaon dayta a nasao a suheto. Damona a maisuro iti panagseserrek.

Napintas ti venue ti training. Airconditioned. Kasta met dagiti nakaikuartoanda. Ngem anian ta naibatang iti ground floor a kurang dagiti tawa a jalousie ket nastrek ida dagiti lamok a nangdadael iti makalawas a pannaturogda nga adda dita.

Napia dagiti dadduma ta inim-imasda ti naturog.

Ngem saan a dayta ti napateg. Nupay idi damo, adayo ti riknana iti nasao a training, in-inut a naawatna. Makasakdoak met ngata kadagiti istratehia a mabalin nga ipakatko kadagi talaga a subject-ko, kinunkunana.

Kadayta a pampanunot, naiturongna met laeng ti atensionna iti training. Saan a pulos a nagkabsiw iti idadar-ayna tunggal session. Saan a naladaw ken nagbalin a paset kadagiti aktibidad nga intuyang dagiti nanglektiur.

Mannursuroda amin kadayta a training, pagaammona dayta. Ngem nalpay kadagiti nadlawanna.

Umuna ditan ti kaawan ti disiplina dagiti dadduma. Ibatida lattan dagiti nagawanganda a botelia ti danum kadagiti sirok ti tugawda nupay sangkaibaga dagiti agleklektiur nga iballeng koma dagitoy iti naisangrat a paggiananda.

Iti uneg ti klase, addada nga agipawpawil kadagiti ubbing nga agiwara ngem ania dayta a napaliiwna?

Maikadua ti saan nga agressat a pannakaaramat ti selpon nupay manarimaan ti panagadal ken aktibidad. Idi damdamo pay laeng, naipakaammon nga awan ti agselselpon no madama ti lektiur. Ngem kuidaw, awan nagnagnaanna dayta a pagalagadan.

Addada ruar a ruar iti hallway ket dita a makitintinnawagda iti selpon. Kalpasanna, kudit a kudit, antagayam, agay-ay-ayam wenno agpepeysbuk!

Mannursuroda amin kadayta a training!

Maikatlo, adda dagiti nakaladladaw a sumrek iti session. Iranada ti pannakatsek ti attendance. Inton malpasda, kasda la asuken nga agpukaw. Aginruruarda a mapan iti banio ngem pulos a didanton agsubli.

Adipen ti tisada amin kadayta a panagsanay.

Karabiyanna, nadlawanna dagiti kakaduana iti kuarto a tengnganton ti rabii wenno parbangon payen a sumangsangpetda. Segun iti istoria dagitoy iti kabigatanna, napanda la gayam nagkape (kape kunada kadaytay nakaulaw kadakuada) ken nagsapul iti nangep-ep iti riknada. Napia koma no awan pay bukodda a pamilia a pinanawanda.

Ala, ket mannursuroda amin!

Iti pannakaammona a riwriw a gatad ti nailatang kadakuada kadayta a training, saan a dina naala ti nagsanamtek. Kasano ngarud a nasudi ti pannakaiyallawat kadagiti ubbing dagiti nayadal kadakuada no sabali met ti inub-ubra dagiti dadduma? Saanda ngata a makonsensia kadagita nga inar-aramidda?

Panagriknana, inabuso dagiti padana nga adipen ti tisa dagiti buis dagiti umili. Ta nagtaudan koma ti naipundo kadakuada no kadagiti buis?

Balisungsong a baliktad, naisipna, aglalo ket Araling Panlipunan dayta panagsanay a tinabunuanda. Iti AP, maisursuro no kasano ti panamagbalin iti maysa a tao a mapagpiaran nga umili. Kasano a kasta no sabali met ti obra dagiti mannursuro a mangisuro kadakuada no kasano ti agbalin a maka-Diyos, makabansa, makatao ken makakalikasan?

Iti nasao a training, in-inut a napukaw ti dagensenna. Nupay dinanto isuro ti nasao a subject, adu dagiti naagsawna a mabalin nga ipakatna kadagiti suhetona. Saan a nasayang ti idadar-ayna.

Umuna a training, nupay adayo kadagiti subject-na ti linaonna, saan a magatadan ti nasakdona nga impormasion.

Ken adal! Aglalo ti adal nga inyeg dagiti padana a mannursuro kadayta a training!#

Comments are closed.