Footer

Kalbit

Imbiit ni Judith M. Simon

BRAAAGGG!!!

Naladawen idi nakitana a nag-red light ti sarsarunuenna nga Elf. Nariknana lattan ti pannakaisan-ek ken pannakaipullasitna.

Natayen! inyikkis dagiti nakakita iti napasamak. Daytan ti naudi a nangngegna.

KTA tau, hon. Miz u! Muah!

Uray la limmagto ti rikna ni Noel Lopez, 35, idi maawatna dayta a text ni Lyra. Manarimaan nga agpapa-reaper iti agtallo ektaria a tinalonna (bagi ni tatangna ti nasurok bassit a sangaektaria ngem inyawaten daytoy kenkuana ta saanen a kabaelan ti bagina a sukayen).

Napaisem. Uray la nakarikna iti panagkulaiseg. Naamilna ti napuskol a bibigna ket dina nagawidan ti nanglangit. Rimmimat pay dagiti bugagaw a matana a naipantok iti natimbukel a kayumanggi a rupana.

Naam-ammona ni Lyra iti facebook. Apagbiit a naginnassideg ti riknada. Napasingkedan dayta idi agkitada. Agarup tallopulo minuto laeng a biahe ti motor manipud iti Nagagaran a barangayna iti San Luna a bario ti balasang iti kabangibangda nga ili.

Naynay a rummuarda ken ni Lyra. Ket uray al-aldaw, pagbalinenda a namituen.

“Narabiyanka, ‘pang,” insungad kenkuana iti naminsan ni Rhea nga asawana. Impakadana la a mapanna ipatarimaan ti motorna ta madi ti panippip ken dagiti silawna.

“Naranaak ngamin, ‘mang, idiay plasa ‘tay buddy-k idi haiskulak. Nasurok a duapulo tawenmi a di nagkita. Dayta, naimasanmin ti naginnistoria ta inawisnak metten iti pagpansitan. Adda bassit makaulaw a karaman, siempre.”

Agpayso a kaklasena idi hayskul ti kaduana a nagmalem— ni Mario Caguay wenno Yong. Ngem idiay balayda ti nagkikitaanda, kaduana ni Lyra a sinukonna. Nangnanamda ti maiparit nga agas.

Nasursuro ni Noel ti nagsusuop iti maiparit nga agas gapu ken ni Lyra. Maysa gayam daytoy kadagiti nalimed nga aglaklako idiay ilida. Ni Yong ti pagal-alaanna iti suplay.

Inawis idi ni Lyra ni Noel nga adda papananda a tao iti Abitog. Ammona dayta a lugar ta maysa kadagiti barangay ti ilina. Naklaat laengen idi malasinna ti inyam-ammo kenkuana ni Lyra. Ni Yong, ka-batch-na iti Northern Quezon High School a nagturposanna.

Ket dita a naukisan ti kinatao ni Lyra.

Ngem imbes a kagurana, naisursurot iti aramid ni Lyra. Sinerrekna dayta a negosio. Mangal-ala iti saggabassit nga ilaklakona iti barangayda. Ti maganansiana, isu ti igatgatangna met iti bukodna nga usaren tapno saan nga agdawat iti asawana.

Saan a nakadlaw ti asawana. Binagbagaan ni Rhea.

“Saggabassit ken manmano met laeng, ‘mang,” kinunana.

“Ngem maiparit dayta, ‘pang…”

“Pamadpadasan met laeng. Sa maysa, adu dita ti nakarkaro pay ngem saanda met a magungunay.”

“Addan nakemmo, ‘pang. Saannakto koma a pabasolen…”

Ti saan a nadlaw ti asawana, ti kaadda ti sabali a babai iti biagna.

No pagdasigenna da Rhea ken Lyra, adayo a napimpintas ti in-inaudi. Isu daytay klase ti babai a dimo ibain nga iparada. Kartada nuebe, kuna dagiti mannugal iti purokda. Kaing-ingas pay ni Ellen Adarna! Ni Lyra? Kayumanggi. Idasdasigna ngarud ken ni Kiray nga artista. Isuna laeng ta nasingpet ken nalaing nga agtagibalay ken ina dagiti dua nga annakda—edad pito ken lima.

Iti panagbalin ni Noel a pusher, naisursurot ti lalaki a kabsatna. Nakarkaro payen kenkuana daytoy. Nagaraw. No kasta a naka-take, agriribuk. Isu nga adu ti makaammo iti barioda a maysa nga user.

“Isardengyo koman dayta nga ar-aramidenyo,” kinapatang ida ti amada iti maysa a malem. “Ammoyo metten no kasano kapudot ti gobierno kontra iti droga.”

“Wen, tatang,” ti naisungbatda laeng nga agkabsat. Ngem, wen, a papaaweng a kunada. Ta no sapulen ti bagida ti agas, saanda a malabanan. Ikalukagda ti makausar uray kanigid-kanawan ti madamdamagda a matoktokhang. Aglalo ket immadu payen ti parokianoda.

AGKAMBAS ti presio ti irik, dayta ti impakada ni Noel iti asawana idi maawatna ti text ni Lyra. Ti nangisit a TMX 155 a motorna ti naglugananna a nagturong iti lugar a pagkitkitaanda ken ni Lyra.

Nagtugmok ti mail-iliwan a riknada ken ni Lyra. Ingiddanda pay ti nagusar iti maiparit nga agas. Kasla tumtumpaw dagiti riknada iti ulep.

“Love you, hon…” kasla maitubtubong pay laeng kadagiti lapayagna ti nalailo a timek ni Lyra bayat ti panangpampanurnorna iti haywey a dalanna nga agawid. Sumagawisiw nga agmaneho.

Idi agbalaw, naka-red light gayamen ti sarsarunuenna a lugan. Naladawen idi baddekanna ti preno.

NAAMMUANNA laengen a nagmaysa ken dua ti biagna idi makapuot. Nagdakkelan dagiti dait iti ulo ken bagbagina. Nagasat kano ta nalasatna ti pannakadisgrasiana.

“Agyamanka ta nadisgrasiaka,” kinuna ni Rhea idi makapuot. “Naasi pay laeng ti Dios kenka, ‘pang. Nalabit, kayatnaka a kalbiten.”

“Apay, ‘mang?” masmasdaaw.

“Nairamanka koma met nga immayda tinokhang. Innalada ni Ganie,” ti kabsatna ti kayat a sawen ni baketna. Agpakpakaasi ti rupa daytoy. Kasla makisarsarita nga isardengna koman ti aramidna. “Naimbag ta natiliw laeng da kayong saan a kas iti agnagan ti Yong idiay Abitog a napatay ta limmaban kano idi tiliwenda.”

Napetpetanna ti ima ti asawana. Saanna a napupuotan ti panagarimayang dagiti luana.

Saan pay a naladaw, naikarina laengen iti bagina. Kimmusnaw ti ladawan ni Lyra iti panunotna ket dagiti putotna ti pimmatak a naimatanganna.#

Comments are closed.