Footer

BANNER: House Majority Leader Fariñas, naideklarar a persona non grata iti Ilocos Norte

Kinuna ni House Majority Leader Rodolfo Fariñas a pilaanna iti graft charges ken dumawat iti damages maikontra kadagiti miembro ti Sangguniang Panlalawigan ti Ilocos Norte gapu iti panangipasada iti resolusion a nangideklara kenkuana a persona non grata iti probinsia.

Kinuna ni Fariñas, mangibagi iti Umuna a Distrito iti Ilocos Norte,  a nadangranan gapu iti panangaprobar dagiti walo a kameng ti Sangguniang Panlalawigan ti Ilocos Norte iti resolusion a nangideklarar kenkuana a persona non grata iti Ilocos Norte ket mabalinda a makasuan iti graft.

Kinuna ni Fariñas a “maysaak nga umili iti daytoy a pagilian, ket awan ti asinoman, nangruna dagiti miembro ti Sangguniang Panlalawigan, a mangideklarar kaniak , wenno uray iti sabali nga umili iti daytoy a pagilian, a persona non grata”.

Kinuna pay ni Fariñas nga uray dagiti nakonbiktar a kriminal ket saanda pay a naideklarar a kasta idinto nga innayonna nga “isu ti nabutosan a mangibagi iti umuna a distrito ti Ilocos Norte, ken majority leader iti House of Representatives”.

Maipalagip nga inaprobaran ti Provincial Board ti Resolution No. 2017-06081, nga inesponsoran ni Sangguniang Panlalawigan Member Atty. Vicentito M. Lazo ken Vice Governor Angelo Marcos Barba a nangideklarar ken ni Fariñas a persona non grata.

Nagramut daytoy kaudian a riri iti nagbaetan ni Fariñas ken ti gobierno probinsial nga idauluan ni Gov. Imee Marcos iti panangilungalong ti majority leader iti congressional inquiry mainaig iti mapapati a saan a nasayaat a pannakaaramat dagiti pondo ti tabako a nagtungpal iti panangdetener ti Kamara  kadagiti innem nga opisial ti gobierno probinsial ti Ilocos Norte gapu iti contempt kalpasan ti mapapati a dida panangsungbat kadagiti saludsod kabayatan ti House hearing.

Iti baet ti panangiyisio ti Court of Appeals iti writ, saan latta a nagtungpal ti Kamara idinto nga imballaag pay ni Speaker Pantaleon Alvares ti pannakawara ti nasao a korte.

Kas alegasion ni Fariñas, agarup P66.45 million a pondo manipud iti tobacco excise tax kas intuding ti RA 7171 ti naaramat a pinanggatang kadagiti minicab, bus ken mini-truck para kadagiti munisipalidad ti Ilocos Norte  idinto a maaramat koma daytoy para kadagiti proyekto ti livelihood ken inprastruktura a mangbenepisiar kadagiti mannalon.

Alegasion ni Fariñas nga inotorisar ni Governor Imee Marcos ti pannakagatang ti 115  assorted motor vehicles idi 2011 ken 2012 nga awan ti naisayangkat a public bidding ken naruk-atan dagiti pondo babaen ti cash advance a panagsalungasing iti procure-ment law ken ti auditing code.

Ngem kinuna ni Marcos a nasurot amin nga aplikable a linteg ken mandato a govern-ment procurement ken bidding procedures iti pannakagatang dagiti behikulo, ken otorisado ti Sangguniang Panlalawigan.

Kinuna pay ni Marcos a naipababaen ti purchases iti umisu nga audit ken post-audit examinations babaen ti Com-mission on Audit ket awan ti nasarakan nga iregularidad dagiti transaksion.

Kinondenar pay ni Marcos ti pannakadetene dagiti empleado ti gobierno probinsial ti Ilocos Norte kas “nasapa a panagpo-litika” idinto nga indariragna ti pannakailisi koma dagiti ordi-nario nga empleado iti “naipa-nurok a pannakaaramat iti bileg”. (Tawid News)

 

Comments are closed.