Footer

Motorsiklo ti menor de edad, nasukalan a natakaw

CERVANTES, Ilocos Sur –  Nasukalan a carnapped ti motorsiklo ti menor de edad a naaresto iti checkpoint iti Cervantes-Mankayan road gapu iti panaglabsingna iti ordinansa idi malem ti Hunio 25.

Iti report manipud iti police station ditoy nga ili, natiliw iti checkpoint  ni Iverson Angayen, 15, estudiante, ken residente iti Barangay Concepcion ditoy nga ili idi malem ti Hunio 25 gapu ta naungor ti exhaust pipe ti luganna a panagsalungasing iti ordinansa ti munisipio.

Naipan ni Angayen iti police station ket nasukalan ditoy a malaksid nga awan ti plate number ti luganna, naunas pay dagiti numero ti makinana  ken awan ti naipakita ti menor de edad a dokumento a mangipakita a kukuana ti lugan.

Iti panangberipika ni PO3 Rodolfo E. Imperial, Jr. manipud iti HPG, Baguio City, positibo a kinumpirma ti nasao nga opisina a naireport a natakaw ti lugan iti La Trinidad, Benguet.

Impalgak ni Erna Angayen, ina ni Iverson, a kukua ti maysa nga Alvin Bayading ti Barangay Suagayan, Quirino, Ilocos Sur.  Kinuna ti baket nga insukat ni Bayading ti bakana iti nasao a motorsiklo manipud ken ni Kagawad Bobby Banagan, Quirino, Ilocos Sur.

Naikustodia ti motorsiklo iti police station sa naipaima iti HPG, Baguio City para iti umisu a disposision ken dokumentasion.

Kabayatanna, narekobre ti ikut ti maysa a menor de edad ti maysa a motorsiklo a natakaw iti sango ti kapilia sadiay Barangay Binalayangan, Sto. Domingo, Ilocos Sur idi rabii ti Hunio 24.

Inreport da Marina Tadlas y Pagador, 63, ken ni Joel Tadlas y Pagador, 33, agpada a residente iti Barangay Naglaoa-an, Sto. Domingo, Ilocos Sur a natakaw ti motorsikloda a Honda XRM nga imparada ti baket iti sango ti United Pentecost Church a masarakan sadiay Barangay Binalayangan, Sto. Domingo idi rabii ti nadakamat a petsa.

Kinuna ni Tadlas a nasukalanna laengen nga awan ti motorsiklo iti nangiparadaanna.

Segun ken ni Tadlas, pinanawanna ti motorsiklo a di natulbekan.

Natuntonan dagiti polis ti motorsiklo iti ikut ti maysa a Jamaica Agustin y Paz, 14, Grade 9 ti Naglaoa-an National High School ken residente iti Barangay Sived, Sto. Domingo.

Naikustodia iti police station  ti suspek ken ti motorsiklo para iti dokumentasion ken disposision. (Tawid News)