Footer

BANNER: Dati a soldado, barangay captain, nagudas iti pammaltog

TAGUDIN, Ilocos Sur – Tallo nga insidente ti pammaltog ti naireport iti itatapog daytoy a bulan iti ili ti Burgos, Sta. Cruz ken ditoy nga ili a nakagudasan ti maysa a dati a soldado ken maysa a barangay captain ken nakaiyospitalan ti maysa a mannalon.

Naireport a biktima ti pammaltog a puon ti nakatayanda da Jerry Valdez y Taja, 56, dati a kameng ti Philippine Army, natibo iti San Isidro, Luna, Apayao ngem agdama a residente iti Barangay Callitong, Burgos; ken Salvacion Barangay Captain Baltazar Lodia Sr. y Lodia, 60, naasawaan. Naiyospital iti Tagudin General Hospital, Barangay Bio, Tagudin ti maikatlo a biktima ti pammaltog a ni Jeffrey Cabalbag y Andaquig, 33, mannalon.

Nainaganan a maysa a Wilven Gayao ti nangpaltog ken ni Valdez idinto a nabigbig a maysa a Rufino Gonzaga y Tabianan, 46, welder, ti pimmaltog iti barangay captain.

Di pay nabigbig ti nangpaltog ken ni Cabalbag.

Iti panagimbestiga dagiti polis iti pannakapaltog ni Valdez, limtuad a nagriri ti biktima ken ni Gayao bayat ti panaggiinomda iti balay ti suspek.

Segun iti report, simrek ti suspek iti kuartona, innalana ti paltogna sana pinaputokan ti biktima a nagsagrapan daytoy iti sugat iti makannigid a barukong ken makannigid a sakana.

Naglibas ni Valdez a nakalugan iti Honda TMX motorcycle.

Awanen ti biag ti biktima idi naidanon iti balay-pagagasan.

Iti panangproseso ti SOCO team, Candon City iti crime scene, nakarekobreda iti 3 shotgun pellets ken maysa a shotgun wad.

Iti kaudian a report, boluntario a simmuko ni Gayao iti police station ti Sta. Maria. Nakasuan ti suspek iti homicide ngem nagpiansa iti P80,000.00 para iti temporario a wayawayana.

Kabayatanna, mapapati a dinemdem ni Gonzaga ti maysa a kaso a naareglo iti napalabas iti barangayda ket daytoy ti motibo a nangpaltoganna ken ni Barangay Captain Lodia idi sardam ti Hulio 3.

Kas maibatay iti panagimbestiga dagiti polis, immuna a nagginom ni Gonzaga iti tienda ni Kagawad Jonathan Lagrana ket idi nabarteken, nagprobokar sa nagturong iti balay ti barangay captain a nakaiggem iti paltog.

Idi rimmuar ni Lodia, pinaltogan ni Gonzaga a nakatiruan ti makannigid a paset ti siket ti barangay official.

Intaray da Kagawad Lagrana ti biktima iti Ilocos Sur District Hospital, Barangay Bio, Tagudin ngem naideklara daytoy a dead on arrival.

Bayat a maisursurat daytoy, birbiroken dagiti polis ni Gonzaga.

Iti pammaltog iti Barangay Villa Garcia, Santa Cruz, agbuybuya ni Cabalbag iti telebision iti uneg ti balayna idi pinaltogan ti di pay nabigbig a suspek a nagsagrapanna iti sugat iti makannawan a paset ti likudna.

Nakarekobre dagiti inbestigador iti 5 a kapsula ken maysa a buli manipud iti cal. 45 iti nakapasamakan ti krimen.

Di pa ammo ti motibo ti pammaltog. (Tawid News)