Footer

Naganawa iti susik, nabagsol, natay

SAN JUAN, Ilocos Sur – Naganawa daytoy biktima iti panagriri ti kabsatna ken kalugaranda ngem isu ketdin ti nakabagsolanna a puon ti nakatayanna.

Naideklara a dead on arrival iti Pira Clinic and Hospital ni Adrian Valorozo y Rafanan, 41, naasawaan, gapu iti sugatna iti barukong kalpasan a binagsol ni Rolando Arellano y Tico, 51, kalugaranna met laeng, idi rabii ti Hulio 2.

Segun iti report, nagsubang da Amante Valorozo, kabsat ti biktima, ken ni Arellano bayat ti panagginomda ngem napagtalna ida dagiti kaarrubada.

Mapapati a pimmanaw ti suspek ngem idi nagsubli, nakaarmasen iti imuko ket kinaritna ni Amante.

Nagganawa ni Adrian Valorozo ngem isu ti binagsol ti suspek sa nagtaray a naglibas.

Iti pannakaisurat daytoy, birbiroken dagiti polis ti suspek.#