Footer

2 motorista, nadunor iti aksidente

BANTAY, Ilocos Sur – Dua a motorista ti nainbolbar iti aksidente maigapu iti panagkarerada iti national highway a sakup ti Barangay Paing, ditoy nga ili idi rabii ti Hulio 19.

Agpada a naitaray iti Metro Vigan Cooperative Hospital, Bantay ti nagmaneho iti TMX a motorsiklo a maysa a Ricky Ramos y Valdez, 33, baro, ken residente iti Barangay Tiagan, San Emilio, Ilocos Sur ken ti insakayna a ni Jomar Nabubos, 25, baro, ken residente iti Barangay Langcuas, San Emilio, ken ti di nainaganan a drayber ti XRM motorcycle gapu kadagiti dunor a sinagrapda maigapu iti nasao nga aksidente.

Segun ken ni Paulo Manuel y Tinaya, 19, traffic controller iti maar-aramid a rangtay a nakapasamakan ti aksidente, agkinkinnamat nga agpalaud ti Honda TMX motorcycle a minaneho ni Ramos ken ti XRM motorcycle a minaneho ti di pay nabigbig a motorista ket iti nasao a construction site, dinungpar ti TMX ti sign board a naikabil iti tengnga ti agpalaud a linia a puon ti nakaikrasanna.

Sinapgid met ti sumarsaruno nga XRM motorcycle ti TMX motorcycle a nakaigapu ti pannakaikrasna.

Intaray dagiti nagresponde a polis ken kameng ti MDRRMC dagiti biktima iti ospital para iti pannakaagasda.#