Footer

BANNER: Agayan-ayat, nahold-ap bayat panagpallailangda igid ti baybay

STA. CATALINA, Ilocos Sur – Napanda nagpallailang nga aggayyem iti igid ti baybay ti Barangay Paratong ditoy nga ili idi sardam ti Hulio 19 ngem nagtunged daytoy iti pannakahold-apda ken ti pannakaitaray ti motorsiklo ti lalaki.

Nagpulong da Jayvee Amigable y Aspa, 19, baro, estudiante, ken residente iti Barangay Beddeng Daya, Vigan City ken ti gayyemna a babai a ni Genesis Bilog y Gandia, 19, awanan asawa, ken residente iti Barangay Burgos, Sta. Lucia, Ilocos Sur, a hinold-ap ida ti dua a lalaki ken intarayda ti motorsikloda bayat ti kaaddada iti igid ti baybay ti nadakamat a barangay idi agarup 7:30 ti sardam ti nasao a petsa.

Kinuna ni Amigable a dida nailasin dagiti suspek ta naabbongan ti kagudua ti rupada iti panio.

Segun ken ni Amigable, sinublatna ti Raine MCX 110 motorcycle ti ikitna a ni Teresita Pugal y Aspa ket daytoy ti naglugananda ken ti gayyemna a ni Genesis a napan a nagpasiar iti igid ti baybay ti Barangay Paratong idi agarup 7:30 ti sardam ti Hulio 19.

Ngem idi aggawidda koman, inasitgan ida dagiti suspek ket maysa kadagitoy ti nangpaturong kadakuada iti paltog sana imbilin nga iyawatda dagiti naggian iti bulsada idinto nga imballaagna ti panangpapatayna kadagiti biktima no agkitakitda.

Nakaarmas iti kutsilio ti maikadua a suspek.

Gapu iti butengda, inyawat dagiti biktima ti kuartada a P200.00, Myphone nga agbalor iti P3,000.00, Samsung nga agpateg iti P5,000.00, ken ti tulbek ti motorsiklo.

Imbilin manen ti nakapaltog nga umaddang nga umadayo dagiti biktima ket idi nakaadayodan, sinakayan dagiti suspek ti motorsiklo sada nagpakaskas a naglibas.

Kadua dagiti polis dagiti biktima a nangsawar kadagiti suspek ken nangipatulodda pay iti flash alarm kadagiti kabangibangda a police stations ngem negatibo ti resultana. (Tawid News)