Footer

Naikras a motorista, pinilidan ti pick-up

STA. LUCIA, Ilocos Sur – Natay ti maysa a motorista gapu iti pannakapilidna kalpasan a naikras ti motorsiklona iti national highway a sakup ti Barangay Sabuanan ditoy nga ili idi rabii ti Hulio 27.

Naideklara a dead on arrival ni Michael Anthony Baculo y Ceralde, 25, awanan asawa, ken residente iti Barangay Mambog, ditoy nga ili idi naidanon iti Candon City Hospital gapu kadagiti sinagrapna a dunor iti ulo, pannakatukkol ti makannigid nga imana ken sugat iti nadumaduma a paset ti bagina.

Nabigbig ti nakaatal kenkuana a maysa a Rizny Aljo Agbunag y Tabaco, 22, awanan asawa, ken residente iti Barangay Nagsingcaoan, Galimuyod, Ilocos Sur.

Kas maibatay iti panagimbestiga dagiti polis, agpaabagatan a direksion ti Suzuki Raider 150 a motorsiklo a minaneho ni Baculo ket idi makadanon iti nakapasamakan ti aksidente, napukaw ti biktima ti kontrolna iti manibela ket naikras iti kalsada.

Mapapati a saan a nakapag-preno a dagus ni Agbunag a nagmaneho iti Ford Ranger Pick-up a kasabet ti motorsiklo ket napilidanna ni Baculo.

Intaray ni Agbunag ni Baculo iti Candon City Hospital ngem natayen daytoy idi maidanon iti ospital. (Tawid News)

Comments are closed.