Footer

BANNER: Manhunt, clearing ops iwaywayat gov’t troops kontra nakaengkuentroda LCTs

SALCEDO, Ilocos Sur – Agtultuloy ti panangsunson dagiti tropa ti gobierno kadagiti naglibas a kameng ti lokal a terorista a grupo a nakaengkuentro ti tropa ti gobierno iti kabakiran a paset ti Barangay Sorioan, ditoy nga ili idi bigat ti Hulio 27.

Maysa nga amasona ti naireport a natay ken nasugatan ti sumagmamano a rebelde ken lima a soldado iti engkuento iti nagbaetan ti tropa ti gobierno ken communist terrorists iti nadakamat a barangay a nagpaut iti 30 minutos.

Iti biang ti tropa ti gobierno, malaksid ken ni Lt. Jade Lyzterdan P. Gavino, nangidaulo iti tropa ti gobierno, nasugatan da Cpl. Robertson C. Caalim, Pfc. Jayson B Aboc, Pfc. John Joshua M Toledo, ken Pfc. Jeffrey L Alferez ket naitaray dagitoy iti Candon General Hospital, Candon City para iti pannakaagasda.

Segun ken ni Lt. Col. Julio Osias, commanding officer ti 91st IB, sapsapulenda pay laeng ti nakaipanan ti bangkay ti di pay nabigbig nga amasona ken no sadino nga ospital ti nakaitarayan dagiti nasugatan a rebelde.

Nakarekobre dagiti soldado iti nakapasamakan ti engkuentro iti 20 rounds ti M-14, improvised explosive device, subersibo a dokdokumento ken personal a ramramit.

Napasamak ti engkuentro bayat ti combat operation nga inwayat ti maysa nga squad ti 81st Infantry Company, PA a binukel ti sangapulo a soldado nga indauluan ni Gavino iti kabakiran a paset ti Barangay Sorioan, Salcedo, Ilocos Sur idi agarup 9:15 ti bigat ti nadakamat a petsa.

Segun iti report, bayat ti nadakamat nga operasion, pinaputokan dagiti mapattapatta a 12 a rebelde a komunista ti tropa dagiti soldado a nakasugatan ti lima kadagitoy. Nupay kasta, nakiranget dagiti soldado a mapapati a nakagudasan ti amasona ken nakasugatan ti sumagmamano kadagiti lokal a terorista.

Segun ken ni Osias, nangiwayatda iti napaingetan nga operasion gapu ta nakaawatda iti report a plano ti NPA, Platun South Ilocos Sur (Platun SIS) ti mangisayangkat iti panagraut iti probinsia.

Iti pannakaisurat daytoy, agdama ti panangiwayat ti Philippine Army iti manhunt ken clearing operation kadagiti naglibas a rebelde.

Naibilin met iti Salcedo police station ken kabangibang a police stations ti panangiwayatda iti checkpoint ken iti panagrekoridada kadagiti ospital ken klinika kas paset iti panangsapulda kadagiti rebelde a mapapati a nasugatan iti nasao nga engkuentro. (Tawid News)

Comments are closed.