Footer

BANNER: Panagpangato ti presio ti bawang, manipulasion ti cartel?

Adda manen cartel iti bawang ket isuda ti mangpangpangina iti presio daytoy a produkto? .

Kinuna ni Senadora Cynthia Villar, chair ti Senate Committee on Agriculture and Food, babaen daytoy cartel naipasulida ti importasion ken nakontrolda ti suplay ti bawang a nangipangato iti presio daytoy a produkto a kaarngi ti napa-samak idi 2014 a simmuyop ti presio ti bawang iti nasurok P300 kada kilo.

Kanaig daytoy, impila ni Villar ti Proposed Senate Resolution No. 389 para iti pannakaiwayat ti panagpalutpot iti naireport a panagangkat ti DA iti bawang ken ti implikasionna iti kellaat a panagpangato ti presiona iti merkado manipud iti P140 kada kilo iti nasurok a P200 kada kilo.

Linagidaw ni Villar ti nakaugalian dagiti opisial ti Bureau of Plant Industry nga adda iti babaen ti Department of Agriculture a panangiyisioda kadagiti agtagtagilako iti permit nga agimport iti bawang idinto a di met angkaten dagitoy ti kasapulan ti pagilian a volume ti bawang.

Kinuna ni Villar nga idi napan a tawen, nagaplikar dagiti traders ken naikkanda iti permit nga agangkat iti 57,000 metric tons a bawang ngem agdagup laeng iti 12,000 MT ti naiserrek ket ngimmato ti presio daytoy a produkto.

Kabayatanna, kinuna ni Ilocos Sur First District Rep. Deogracias Victor Savellano a makitaripnong kadagiti opisial ti BPI tapno mapagpapatanganda ti pannakapadur-as ti industria ti bawang iti probinsia ken iti sibubukel a pagilian.

Kinuna ni Savellano a tutokanda ti presio ti bawang tapno saan a ngumina unay ti presiona tapno saan a maparigat dagiti mannalon ken dagiti consumers.

Idi napan a tawen, indauluan ni Villar ti maysa nga inbestigasion mainaig iti nangato a presio ti bawang ket naitudo a maigapu daytoy iti manipulasion gapu ta ginatang dagiti traders ti prebilihio dagiti kooperatiba ti bawang nga agimport iti daytoy a produkto.

Agdagup laeng iti average a P9,000 MT ti nagtipon a lokal a produksion ti bawang iti makatawen idinto a 139,777 MT ti kasapulan ti pagilian a bawang ti tinawen.

Segun ken ni Villar, kas maibasar iti inisial a panagadalna, nainkalintegan ti P100 kada kilo a presio ti bawang ngem “no ngimmato iti P200 agingga iti P300 kada kilo, sigurado nga adda manipulasion iti presio”. (Tawid News)

Comments are closed.