Footer

EDITORIAL: Panagretiro ni Pacquiao iti Boksing

NASKEN nga agpili ni Senador Manny Pacquiao no ania ti ipamaysana nga aramiden – kas boksingero wenno kas nangato nga opisial ti gobierno?

Kalpasan ti saan a ninamnama a pannakaabak ni Pacquiao iti kampeonato ti World Boxing Organization Welterweight Division iti labanda iti Australiano a ni Jeff Horn babaen ti unanimous decision dagiti hurado, rumbeng a tingitingen a nasayaat ti Pilipino ring icon, no ania a talaga ti rumbeng nga ipamaysana, ti propesionna iti ring wenno iti politika.

Nagduduma dagiti reaksion dagiti apisionado ken fans ti boksing iti pannakaabak ni Pacquiao. Adda dagiti mamati nga isu koma ti nangabak ta kontroladona dagiti ad-adu a rikus ken ad-adu pay dagiti naipastrekna a danog iti kalabanna. Adda dagiti nangbabalaw iti referee a saan a patas iti akemna ta rumbeg koma a binallaaganna ni Horn iti masansan a pannakitim-og ken panangsikona iti kalabanna, ken panangpasardengna koman iti ranget iti maikasiam a rikus idi saanen a lumaban ti Australiano.

Adu dagiti nakapaliiw nga iti tawen ni Pacquiao a 38 ket adun ti bimmuntogan ken kimmapsutanna a pabor ken ni Horn nga agtawen laeng iti 29 ken nataytayag ngem ti senador. Patienda a naabak ni Paquiao gapu iti tawenna ken nakurang a panagsanayna iti laban. Adda dagiti mamati nga iti tawen ni Pacquiao a limmaban iti naub-ubing nga amang ket rumbeng ti napapaut ken naing-inget a panagsanay a saanna a naaramid gapu ta nabingay ti atensionna kadagiti nagduduma a pakakumikomanna iti biag.

Adu dagiti saan a mangipagarup nga abaken ti agkabannuag nga Austaliano ti beteranon a Pilipino a kampeon iti labanda sadiay Brisbane, Australia. Dehado ni Horn ken ni Pacquiao kadagiti pusta gapu iti adun a laban ken panangabakna iti professional boxing. Uray iti tangdan, ad-adu nga amang ken ni Pacquiao a napapati nga immawat iti US$10 million, ken US$500,000 laeng ken ni Horn. Uray iti bingayda iti pay per view, ad-adu latta ken ni Pacquiao. Nangabak man ni Pacquiao iti natgedan, napukawna met ti koronana.

Kalkalpas pay laeng ti boksing, ngem adun dagiti mangidurduron iti rematch wenno panaglaban manen da Pacquiao ken Horn ta adu dagiti saan a kombinsido iti resulta iti dayta a laban. Inaklon ni Top Rank promoter Bob Arum a nailanad iti katulagan iti panaglaban da Pacquiao ken Horn nga adda maangay a rematch ngem agdepender dayta iti agsumbangir a partido. Adda dagiti mangidurduron a maangay ti rematch iti Pilipinas.

Uray ni Horn ket kayatna nga aglabanda manen ken ni Pacquiao. Mangabak man wenno maabak ni Horn, dakkel ti maitulong ti karerana iti boksing ti panaglabanda ken ni Pacquiao, ken ngumato la ketdi ti matgedanna ta isun ti mangdepender iti koronana. Ngem awan pay ti pangngeddeng ni Pacquiao no labananna manen ni Horn wenno agretiron iti boksing ken ipamaysana laengen ti akemna kas senador ti pagilian.

Manipud idi nangabak ni Pacquiao a kongresista sadiay Sarangani, adun dagiti mangidardarirag a panawannan ti boksing ken ipangrunanan ti akemna kas opisial ti gobierno a binutosan dagiti tattao. Immadu pay dagiti agkalikagum nga agretiron iti boksing idi nangabak a senador iti eleksion idi Mayo 9, 2016 ta kas nagpabotos nga opisial ket rumbeng nga ipangrunana ti akemna iti gobierno, saan ketdi a ti propesionna.

Uray ti asawa ni Pacquiao, ti vice governor ti Sarangani a ni Jinkee, dagiti annakda ken ti inana a ni Mommy Dionisia ket nabayagen nga ibagbagada iti publiko a kayatdan nga agretiro ni Manny ta madanaganda iti dakes a mapasamak kenkuana tunggal makilaban iti lona. Ngem saanda a makombinsir ni Pacquiao nga aginanan iti boksing.

Narigat a maallukoy ni Pacquiao nga agretiron iti boksing a nangipaay kenkuana iti kinabaknang, kinalatak, turay ken dadduma pay kinagasat manipud iti nakarigrigat a panagbiagna bayat ti kinaubingna agingga iti kinabarona sadiay General Santos City a nakayanakan ken dimmakelanna.

Aglaplapusananen ti kinagasat ken grasia a nagun-od ni Pacquiao. Naindaklan a dayaw ti Pilipinas ti impaayna iti panaglatak ken panagkampeonna iti boksing iti lubong. Narigaten a maartapan ti record-na iti boksing kas kampeon iti walo a dibision iti lubong. Maibilangen isuna a maysa kadagiti kalaingan a boksingero iti lubong. Iti naurnongna a kinabaknang, saannan a magasto dagiti nasapulanna ken nakausaran dagiti natgedanna. Naisaganaannan iti nagin-awa a masakbayan dagiti annakna ken uray pay dagiti agbalinto nga appokona. Narimatto met latta ti masakbayanna iti politika agingga nga agtalinaed ti agdama a kultura iti eleksion, ket mabalin a tarigagayannanto pay ti ngumato iti agdama a saadna.

Ania pay ti kayatna a paneknekan iti biagna? Ipakpakitana ti kalikagumna nga agballigi ken aglatak iti nagduduma a benneg iti biag: kampeon iti boksing; senador ti pagilian; pastor ti born-again a nangtalikud ti sigud a pammatina; nakaturpos iti kurso iti kolehio babaen ti special program; Army colonel iti reserve force; playing-coach ken team manager iti Philippine Basketball Association; recording artist, artista iti pelikula ken dadduma pay a pagessemanna.

Iyad-adal ni Pacquiao ti Ebanghelio, ngem adu dagiti aramidna a maikontra iti Sao ti Dios. No pagturayenna ti panagtarigagayna kadagiti nailubongan a banag kas ti nangatngato a turay, ad-adu pay a kinabaknang ken pammadayaw, saanto pay nga agretiro iti boksing agingga a kabaelanna. (Eden A. Alviar)

Comments are closed.