Footer

EDITORIAL: Tax Reform Package

ADU dagiti tarigagay nga isayangkat ti agdama nga administrasion kas impalgak ni Presidente Rodrigo Duterte iti maikadua nga State of the Nation Address-na. Amin dagitoy ket makaapektar kadagiti Pilipino a rumbeng a tingitingen dagiti umili no ania ti ibungana iti panagbiag dagiti umili.

Maysa a kangrunaan a makaapektar iti biag dagiti amin nga umili ket ti idurduron ni Presidente Duterte iti Kongreso a pannakaipasa iti Tax Reform Bill wenno reporma iti panagbayad iti buis tapno manayonan ti makolekta nga ingreso a mausar a pondo ti gobierno.

Maibasar iti gakat, maipangato ti balor ti tax exemption wenno saanen nga agbuis ti nababa a masapulan dagiti mangmangged wenno trabahador. Ngem maingato met ti buis dagiti kangrunaan a produkto a kasapulan unay dagiti tattao a mangapektar ti presio dagiti dadduma pay a kasapulan.

Maysa kadagiti uppat a kangrunaan a paset ti Tax Reform Package nga insagana ti Department of Finance ket ti pannakaipababa ti personal income taxes malaksid kadagiti nangato ti matgedanda. Iti naisingasing a Tax Reform Package a mairugi inton 2020, dagiti agganganar iti P250,000 agpababa ket exempted wenno saanen nga agbayad iti personal income taxes. Segun iti DOF, mabenepisiaran dagiti 83% dagiti taxpayers a sakupen daytoy a bracket.

Dagiti met makategged iti P250,000 agingga iti P400,000 iti tinawen ket agbayad iti income tax rate a 20% iti surok ti P250,000. Dagiti agsusueldo iti P400,000 agingga iti P800,000 iti tinawen ket agbayad iti fixed amount a P30,000 ken 25% ti surok ti P400,000. Dagiti met makategged iti P800,000 agingga iti P2 million iti tinawen ket agbayad iti buis iti fixed amount a P30,000 ken 30% ti surok ti P800,000. Dagiti agsusueldo iti P2 million agingga iti P5 million iti tinawen ket agbayad iti fixed amount a P490,000 ken 32% ti surok ti P2 million.

Dagiti met agtegtegged iti nasurok a P5 million iti tinawen ket masingir iti fixed amount a P1.45 million ken 35% ti surok ti P5 million.

Mairaman pay iti Tax Reform Package ti pannakaingato ti buis ti krudo wenno diesel, petroleum, ken dadduma pay nga oil products. Insingasing daytoy ti DOF a pannakaingato ti buis kadagitoy a produkto tapno mabalansena ti makissayan a makolekta a personal income tax dagiti agsusueldo iti nababbaba ngem P250,000 iti tinawen.

Segun iti panagadal ti DOF, ti rason ket dagiti kangatuan a sangapulo wenno top 10%, wenno agarup dua a million a pagtaengan dagiti agus-usar iti nasurok a kagudua iti kadagupan dagitoy a produkto iti Pilipinas. Naadal pay a dagiti top 1% dagiti Pilipino a pamilia ket makausar iti 13% iti kadagupan dagitoy a produkto.

Iti agdama ket awan ti excise tax iti diesel ken maibasar iti singasing, ti buis iti krudo ket manayonan iti P3 ti kada litro inton 2018, ken P5.00 inton Enero. 1, 2019, ken P6.00 inton Enero 1, 2020.

Manayonan pay ti excise tax dagiti produkto a gas wenno kerosene, liquefied petroleum gas (LPG), ken bunker oil iti kapada a P3 kada litro (kilo iti LPG) inton 2018; P5.00 inton 2019; ken P6.00 inton 2020.

Dagiti dadduma pay a produkto petroleo kas ti gasolina, lubricating oils, ken grasa ket masingir iti nayon a buis nga P8.00 ti kada litro wenno kilo inton 2018; P9.00 inton 2019; ken P10.00 inton 2020.

Mairaman pay iti Tax Reform Package ti pannakaikkat ti tax exemptions iti 12% Value Added Tax tapno makakolekta ti gobierno iti ad-adu nga ingreso ti upa wenno lease dagiti residential units; bayad ti low-cost and socialized housing, power transmission, domestic shipping importation, boy scouts and girl scouts, ken dagiti VAT exemptions kadagiti espesial a linteg a mangsakup kadagiti senior citizens ken people with disability.

Karaman pay iti Tax Reform Package ti baro nga Excise Taxes kadagiti Cars and Automobiles wenno kotse ken lugan. Uray addan excise tax dagitoy a lugan ket manayonanto pay laeng no maaprobaran ti linteg.

Ti excise tax ket agdepende iti net selling price ti importer wenno manufacturer ti lugan a mainayon iti final selling price dagiti kotse. Ti naisingasing nga excise taxes kadagiti lugan inton 2018 ken 2019: para kadagiti saan a nangatngato ngem P600,000, agbuis iti 3% (2018) ken 4% (2019) iti pategna; P600,000 agingga iti P1.1 million, agbuis iti P18,000 ken 30% ti surok ti P600,000 (2018) P24,000 ken 40% ti surok ti P600,000; dagiti agpateg iti P1.1 million agingga iti P2.1 million, agbuis iti P168,000 ken 50% ti surok ti P1.1 million (2018), ken P224,000 ken 60% ti surok ti P1.1 million; dagiti agbalor iti P2.1 million agingga iti P3.1 million, agbuis iti P668,000 ken 80% ti surok ti P2.1 Million (2018), ken P824,000 ken 100% iti surok ti P2.1 million; dagiti agbalor iti nangatngato ngem P3.1 million ket agbuis iti P1.468 million ken 90% ti surok ti P3.1 million (2018) ken P1.824 million ken 120% ti surok ti P3.1 million.

Nasayaat ti pannakaingato ti tax exemption dagiti minimum income earners, kasta met ti pannakaingato ti excise tax dagiti kotse ken lugan. Ngem dakes ti epekto ti pannakaingato ti buis ti krudo, LPG ken dadduma pay a produkto petroleo ta daytoy ket pangatuennanto amin a presio dagiti kangrunaan a magatgatang ken serbisio a kasapulan dagiti tattao. Ti pannakaikkat ti VAT exemption dagiti serbisio ken upa ket pangatuenna met ti bayad dagiti tattao kadagiti produkto ken serbisio.

Nasken ti nainget a pannakaamiris ti Tax Reform Package tapno saan nga ad-adda a maparigat dagiti kadawyan a Pilipino. (Eden A. Alviar)

Comments are closed.