Footer

NI ETONG

Sarita a para ubbing ni Jobert M. Pacnis

(Umuna iti dua a paset)

 

KINAMAT ni Etong, addan iti Maikanem, ti nabugtakna a tukak iti puon ti tsiko iti dayaen ti balayda kabayatan ti panagsapulna iti lawwalawwa. Binautna iti ruting a napidutna. Napadamgisan ti bukot ti tukak. Nagtutot. Daras a nagturong iti kakammotitan.
Sinurot ni Etong a maay-ayatan iti pannakakitana nga agtuttutot ti tukak. Kammo-tit, saannan a kinuna. Binaddekna lattan dagitoy. Nakasaysayang dagiti uggot a nasalaponna.
Nagkul-ob ti tukak iti kapuskolan dagiti kammotit. Ngem sinagsagan ni Etong iti kasta unay. Awan nagbambanagan dagiti uggot a nasagsaganna. Naudatal met ti tukak iti rigat a linak-amna.
“Ubram dita?” ni Manang Unnang nga inana ti umas-asideg kenkuana. Nakabitbit daytoy iti lugar ti singko a daing nga aramang. Naggapu iti kantina ti purokda nga Amianan.
“Awan, nanang…” inlibakna.
“Sa addaka dita? Dina-daelmon dagiti mula ni tatangmo a pagug-uggotantayo iti pammigat!”
“Tiliwek koma daytay tuwato, nanang,” inlibakna.
“Etong,” manuktukod ti ikikita ti inana, “diak kayat ti agsalsalawasaw.”
“Agpayso met, nanang.”
“Sapay ngarud dayta bautmo?”
Saan a nakasungbat ni Etong.
“Ala, pumanawkan dita kakammotitan tapno di mailudekludek ti nagbambannogan ni tatangmo.”
Nagmisuot ni Etong. Ngem imbes nga annadanna ti baddekanna, inrantana ketdi a sinagud dagiti kammotit ta masuron la unay. No awan ni nanangna, napatayna koman ‘diay tukak.
“Kitaem met, a, balong ti baddekam,” kinuna ni nanangna.
Ngem saanen a simmungbat. Nagtaray ket nagturong iti kaarruba. Inyablatna ti bautna iti nalabsanna a puon ti guyabano. Napirpirsay dagiti bulong a naaprasanna. Uray pay dagiti kayanga a nalabsanna.
“Papanam pay laeng?” impulikkaaw ni nanangna. “Tumulongka ditoy balay… malemen!”
Ngem saanen a dimngeg ni Etong.
Napangilangil laengen ni Manang Unnang.
KALPASAN a nakapangrabiida, kinasarita ni Manang Unnang ni Etong. Agpalpalpada iti salas idinto nga intuloy ni Manong Dinan ti ar-aramidenna a lagpi nga order ni Lakay Sabas a kaarrubada.
“Balong,” inrugi ni Manang Unnang, “no kasta nga awan ubram, tumulongka met ditoy balay, a.”
“Wen, nanang,” insungbat ni Etong. Nagimbabasa iti librona tapno saan unay a mapagungtan.
“Ken saanmo a pagraranggasan dagiti mulatayo. Laglagipem a dakkel ti maitultulongda kadatayo. Pangalaan iti sidaen, saramsamen a bungbunga ken sadiwa nga angin nga angsentayo. Saan kadi a dayta met laeng ti ibagbagada idiay eskuelayo?”
“Amman, nanang. Sangkasao ni Mam Dianne iti Science-mi a dagiti kano mula ti mangmangted iti oksiheno nga ang-angsentayo.”
“Met la gayam! Isu a rumbeng nga ipategmo dagiti mulatayo.”
“Wen, nanang.”
NGEM kalpasan ti dua nga aldaw, inapalan ni Etong ti palsiit nga ay-ayam dagiti kaadalanna. Saan pay a nakapagpagatang iti lastiko, pinukannan ti bayyabas iti likud ti balayda ta nakitana a napintas a pasanga daytoy.
“Ayna, Balong, inan-anomon dayta mula ni tatangmo a guapple?” agpor-pordios ni Manang Unnang a nakakita kenkuana.
“Agaramidak ti pasanga ti palsiitko, nanang,” kinuna ni Etong.
“Wen, a, ngem apay a dayta pay ti pinukanmo? Dimo pay laeng imbaga ken ni tatangmo ta nagsapul iti sanga dagiti bayyabas idiay bangkag… wenno idiay pampantok.”
Saan a nakauni ni Etong.
“Ungtannaka ita ni ta-tangmo.”
“’Nia daydiay?” ni Manong Dinan ti sumungsu-ngad nga adda assiwna a nagango a sangsanga ti kawkawwati.
“Daytoy anakmo, a!”
“Apay?”
“Pinukanna ‘diay maysa a guapple!”
“Apayen, Etong?” Indisso ni Manong Dinan ti awitna.
“A-agaramidak koma iti palsiitko, ta-tatang…” agtig-tigerger a sungbat ni Etong.
“Ngem apay a dayta pay… hmp, aniaka metten!”
“Sorry, tatang…”
“Impungetmo?’
Adda nabati a dua dangan ‘diay puonna, ‘tang…”
“Nasayaat ngarud ta makaungarto met laeng. Agtallo tawenna pay laeng ket. ‘Ton maminsan, panuno-tem koma a nasayaat ti aramidem, a?”
“Wen, tatang.”
(Adda tuloyna)

Comments are closed.