Footer

PANAGBALIN NGA STATE WITNESS NI NAPOLES

Komentario ni Eden A. Alviar

(Umuna iti dua a paset)

ADU nga umili dagiti masdaaw iti pannakaabsuelto ti kaso ti negosiante ken maibilang nga utek ti P10 billion pork barrel scam a ni Janet Lim Napoles a “serious illegal detention” iti kapidua ken empleadona a ni Benhur Luy a kangrunaan a testigo kadagiti kaso a plunder ken graft kontra iti negosiante.

Inabsuelto ti Court of Appeals 12th Division ti pangngeddeng ti Makati Regional Trial Court Branch a nangsentensia ken ni Napoles iti pannakabalud iti saan a nababbaba ngem 30 a tawen gapu iti illegal a panangtengngelna ken ni Luy a testigo kadagiti kaso kontra iti negosiante nga utek dagiti maanomalia a transaksion ken pannakausar iti Priority Development Assistance Fund wenno ad-adda a nalatak a pork barrel fund dagiti senador ken kongresista.

Idi 2013, puersado a pinatengngel ni Napoles ni Luy a sigud a taltakenna kadagiti transaksionna iti gobierno iti uneg ti maysa a retreat house sadiay Magallanes Village, Makati City aginggana a ni-rescue dagiti operatiba ti National Bureau of Investigation. Naidarum iti serious illegal detention ken naglemmeng idi ni Napoles agingga a personal a simmuko ken ni sigud a Presidente Benigno Aquino III.

Imbutaktak ni Luy iti imbestigasion ti Senado dagiti maanomalia a transaksion ni Napoles kadagiti senador ken kongresista ken dadduma pay nga opisial ti gobierno. Imbulgarna dagiti nabuangay a bogus a non-government organizations a nagbalin a benepisario dagiti billion a pork barrel fund. Nairaman kadagiti naakusaran ken naidarum nga opisial ti gobierno ket da sigud a Senador Juan Ponce Enrile, Ramon Revilla Jr., ken Jinggoy Estrada ken dagiti staff-da. Nakulong dagiti tallo a senador sadiay Philippine National Police Custodial Center iti Camp Crame. Ngem naipa-hospital arrest ni Enrile gapu iti salunatna agingga a pinalubosan ti Korte Suprema a nagpiansa para iti temporario a wayawayana gapu iti human-itarian consideration iti tawenna. Nakakulong pay met laeng da Revilla ken Estrada.

Adda pay dagiti dadduma a senador ken kongresista dagiti inkanta ni Napoles a kakum-plotna iti pork barrel scam. Inimbestigaran ida idi ti Department of Justice idi panawen ni Secretary Leila de Lima, ken pinilaanen ti kaso ti Ombudsman. Kaaduan dagiti mammanday-linteg a naidarum ket dagiti adda idi iti oposision. Adda idi dagiti sayangguseng a sumagmamano a senador ken kongresista a kaaliado ti naglabas nga Aquino adminis-tration ti imbulgar ni Napoles a kakunsabona, ngem saanda a naidarum.

Gapu iti nabara nga isyu ti pork barrel scam, naeskandalo dagiti sumagmamano a kameng ti Kongreso, ken departamento a nagbalin a kalasugan ti pannakagasto dagiti billion a pondo ti gobierno. Nakuestionaran iti Korte Suprema ti kinalehitimo ti pork barrel fund dagiti senador ken kongresista. Inkeddeng ti Korte Suprema nga illegal ti pannakausar ti pork barrel fund ta dagiti senador ken kongresista ket saanda nga akem ti agimplementar iti proyekto ta ti trabahoda ket agputar iti linteg, ket ti agisayangkat kadagiti programa ken proyekto ket annongen ti Executive Branch ti gobierno.

(Adda tuloyna)

Comments are closed.