Footer

2 biktima natakawanda bayat pannaturogda

SAN ESTEBAN, Ilocos Sur – Dua nga insidente ti panagtakaw ti naireport ditoy nga ili ken iti Candon City nga agpada a di napuotan dagiti biktima a sinerrek ida ti mannanakaw a nangkurimes iti kuarta ken alikamenda.

Immuna a nagreport iti polis idi agarup 7:00 ti agsapa ti Agosto 8 ni Leonel Mendoza y Vergara, 51, naasawaan, taxi driver, a natakawan idi rabii ti Agosto 7 ti rest house a kukua ti kabsatna a masarakan iti Barangay Apatot ditoy nga ili.

Naammuan ken ni Atty. Melvin Mendoza y Vergara, 61, naasawaan, ken residente iti 12 Washington St., corner Roosevelt, Maybunga, Pasig City a natakawan iti travelling bag nga aggatad iti P500.00 a naglaon kadagiti aruatenna; sling bag nga agbalor iti P40,000.00 a nakaikabilan ti cash a P3,000.00; Samsung cellphone nga agbalor iti P11,000.00; iPhone 7 nga agbalor iti P40,000.00 ken binocular telescope nga agpateg iti P4,000.00.

Natakaw met ti wrist watch ni Leonel Mendoza nga agpateg iti P3,000.00.

Mapapati a simrek ti mannanakaw iti nakalukat a ridaw ti kusina iti abagatanen a paset ti balay, sa nagderetso iti living room a nangkurimesanna kadagiti agkabsat.

Simrek pay ti mannanakaw iti master’s bedroom a nagturogan ti abogado a nangtakawanna iti iPhone 7 sa naglibas a rimmuar iti maikadua a ridaw ti nasao a master’s bedroom.

Nagreport met iti polis idi agarup 8:30 ti agsapa ti Agosto 8 ni Mark Anthony Ramos Calvo, 23, awanan asawa, sales specialist ti Lucky Me Noodles ken residente iti Barangay Nagsangalan, Vigan City a natakaw ti petakana a naglaon iti koleksionna a sumurok-kumurang P6,000.00 a naikabil iti sling bag nga inkabilna iti lamisaan iti asideg ti ridaw sakbay a naturog iti dagusna nga Aloha Apartment a masarakan iti Barangay San Agustin, Candon City..

Segun ken ni Ramos, pinennekna a nakarikep amin a tawa ken ridaw ti dagusda sakbay a naturog iti agarup 10:00 ti rabii ti Agosto 7.

Nasukalanna laengen idi bumangon iti 6:30 ti agsapa ti kabigatanna a naibitin ti sling bag iti doorknob ti akinlikud a ridaw ken awanen ti koleksionna.

Kinuna ni Ramos a kaduana a naturog iti kuarto ni Orlando Balais, company driver, nga immuna a bimmangon a napan nagluto iti pammigatda.

Segun iti inbestigasion, awan ti pakakitaan a puersado a naluktan ti maindoor. Mapapati a nagna ti mannanakaw iti tawa ti living room sana linuktan babaen ti master ti maindoor.

Agtultuloy ti panagimbestiga dagiti polis mainaig dagiti dua a panagtakaw. (Tawid News)