Footer

Calamay vendor, ginudas nagkalubbon iti motorsiklo

CANDON CITY – Ginundawayan dagitoy suspek ti matutudo a panawen a nangpaltog iti maysa nga aglaklako iti kalamay iti mismo nga abay ti terminal ti maysa a bus sadiay Barangay Paras, ditoy siudad idi rabii ti Agosto 9.

Pimmusay bayat ti pannakatamingna iti Candon City Hospital ni Joel Garcia y Cayabyab, 39, naasawaan, calamay vendor, natibo iti San Carlos, Pangasinan ngem agdama a residente iti Barangay Bagani Campo, Candon City.

Segun ken ni Christopher Neri y Abreo, 37, naasawaan, tricycle driver, agur-uray iti pasaherona iti dayaen a paset ti kalsada, partikular iti linong ti FMW Emission Center nga asideg laeng iti terminal ti Partas Bus idi nakangeg iti dua a nagsaruno a kanalbuong.

Innayonna a nakitana ti biktima a naidalutaytay iti akinlaud nga abaga ti highway ken dagiti dua a suspek a nagaruat iti bonete a naglibas iti abagatan a direksion.

Intaray da Neri ken dadduma pay nga immarayat ti biktima iti Candon City Hospital ngem pimmusay daytoy bayat ti pannakaagasna.

Iti panangproseso dagiti polis iti crime scene, nakarekobreda iti maysa a kapsula manipud iti cal. 45 ken maysa a deformed slug manipud iti bagi ti biktima.

Iti pannakaisurat daytoy, di pay ammo ti motibo ti pammapatay. (Tawid News)

Comments are closed.