Footer

MADUSAN DAGITI AGMANMANEHO NGA AGSESELPON

Komentario ni Eden A. Alviar

MADUSAN dagiti agmanmaneho a makisarsarita wenno agte-text iti cellphone wenno agar-aramat kadagiti nagduduma nga electronic gadgets babaen ti panagmulta wenno pannakakanselar ti lisensiada.

Manipud idi Hulio 6, 2017, nangrugin ti naan-anay nga implementasion ti Republic Act No. 10913 wenno Anti-Distracted Driving Law a mangdusa kadagiti matiliwan nga agar-aramat iti cellphone ken dadduma a gadget kabayatan ti panagmanmanehoda wenno panagdaliasatda kadagiti publiko a lugar ken kalsada.

Sakupen ti linteg dagiti agmanmaneho iti pribado ken publiko a lugan nga addaan iti makina ken pilid; dagiti addaan iti pilid a makina iti agrikultura wenno panagtalon kas ti farm tractor ken kuliglig; construction equipments kas kadagiti grader, bulldozer ken dadduma pay a makina; ken dagiti nagduduma a klase ti transportasion a guyoden wenno iduron ti tao wenno animal kas kadagiti bisikleta, pedicabs, kalesa, karetela, kariton, pasagad, trolley, ken dadduma pay.

Sagudayen ti kabarbaro a linteg ti mangipawil ti umawag wenno agawat ti awag iti cellphone; agaramid, agipatulod ken agbasa iti text message; agay-ayam kadagiti electronics games; agbuya iti video; agkuntar iti calculator; agbasa iti electronic books, ken dadduma pay nga aramid a makasinga ti atension nga agmaneho.

Ipawil ti linteg ti agaramat ti cellphone ken gadget no agkutkuti ti lugan, ken uray no nakasardeng iti red light traffic wenno kadagiti nagkurusan wenno intersections.

Ipalubos met ti linteg wenno exempted dagiti agmanmaneho nga agaramat ti cellphone wenno gadget nga umaw-awag kadagiti autoridad kabayatan ti emergency no adda krimen, aksidente, pangta ti bomba wenno terorismo, uram ken panagbettak, panagkasapulan ti medical nga atension no ti personal a kinatalged ken seguridad ket maikompormiso

Mapalubosan met ti panagaramat kadagiti gadget a saan a nasken nga igganan no la ketdi saan a makalinged iti panagkita ti drayber; panagusar kadagiti navigational applications a naipuesto a nasayaat sakbay ti panagrubuat ti drayber no ti gadget ket maikapet iti paset ti lugan a saan a makalinged iti panagkita ti drayber.

Inyetnag ti linteg dagiti dusa kadagiti matiliwan nga agsalungasing: P5,000 a multa para ti umuna a panaglabsing; P10,000 a multa para ti maikadua a panaglabsing; P15,000 a multa ken tallo a bulan a suspension ti lisensia nga agmaneho para ti maikatlo a panaglabsing; ken P20,000 ken pannakakansela ti lisensia kalpasan ti maikatlo a panaglabsing.

Natudingan a mangiyimplementar ti linteg dagiti agpapaay iti Department of Transportation nangruna ti Land Tranportation Office, Land Transportation Franchising and Regulatory Board, kameng ti Philippine National Police Highway Patrol Group, traffic enforcers ti Metro Manila Development Authority ken dagiti local government units, ken dadduma pay a na-deputized a mangipakat ti linteg.

Naputar ti linteg tapno malapdan ti panagaramat dagiti drayber iti cellphone wenno gadget kabayatan ti panagmanmanehoda ta maibasar iti estatistika ti PNP ket maysa daytoy a kangrunaan a nakaigapu kadagiti adu nga aksidente iti kalsada iti sapasap a pagilian a nakaibuisanen iti adu a biag ken nakadadaelan dagiti napateg a sanikua.

Maysa kadagiti kangrunaan a bunga ti moderno a teknolohia ket pannakaaramid dagiti cellphone ken nagduduma nga electronic gadget a mausar uray sadino a lugar nga ayan ti tao no la ketdi adda signal. Naindaklan dagitoy a gadget para ti komunikasion a mangrangtay kadagiti agaaddayo a tattao. Kasingin met dagitoy nga alikamen ti pannakausaren dagiti nagduduma nga applications, kas ti panagbuya kadagiti palabas iti telebision wenno pelikula, panagbirok iti mapa ken ruta ti direksion, panagaramat ti calculator ken panagbasa kadagiti electronics books.

Napateg dagitoy a moderno nga alikamen ti komunikasion ngem naabusar ti pannakaaramatda ta uray dagiti madama nga agmanmaneho iti lugan ket igiddandan ti agusar a pakasingaan ti konsentrasionda nga agmaneho a gubuayan dagiti aksidente.

Nakalkaldaang dagiti napaspasamaken nga aksidente ti lugan a pinarnuay ti panagaramat dagiti drayber kadagiti gadget a nakairamramanan dagiti inosente a biktima. Adu dagiti drayber ti public utility vehicles a kabayatan ti panagmanmanehoda ket makumikomda met a makisarsarita iti cellphone wenno adda pay dagiti mangisapsapit ti panagbasa wenno panagaramidda iti text message a saanda a maamiris a napeggad ti ar-aramidenda a mabalin a pakairamanan dagiti adu a pasaheroda no maaksidenteda. Adu kadagiti agkukumplot a drayber ti PUV dagiti masansan nga aginnawag iti cellphone bayat ti panagmanehoda tapno maipakaammo wenno maammuanda ti ayan dagiti adu a pasahero wenno lokasion dagiti kakompetensiada a lugan ken drayber.

Nagadun dagiti nabayagen a naputar a linteg ken pagannurotan para ti pannakasaluad ti biag ken aksidente kas ti panagaramat ti helmet kadagiti agmotmotorsiklo kadagiti highway, panagusar ti seatbelt, panagaramat kadagiti umno a silaw iti rabii, pannakaiparit ti agmaneho a nabartek ken dadduma pay paglintegan. Ngem saanda met a nainget a maipakpakat.

Maysa kadagiti kangrunaan a gapu dagiti aksidente iti lugan ket ti kinairresponsible dagiti dadduma nga agmanmaneho. Adu kadagiti drayber nga uray no adda lisensiada ket saanda nga ammo ti road-courtesy ken dagiti umno a pagannurotan. Dagitoy a drayber ket nakaalada iti lisensia nga agmaneho gapu ti kinalukay ti proseso wenno gapu iti panagkunniber dagiti dadduma nga agpapaay iti gobierno.

Nasken ti koperasion ti publiko iti Anti-Distracted Driving Law tapno mailisi iti aksidente dagiti agdaldaliasat kadagiti kalsada. Ngem maipakat ngata a nainget daytoy a linteg wenno agpatingga laeng manen a kas kadagiti dadduma a paglintegan a sinsinan ti pannakaipatungpalna.#

Comments are closed.