Footer

BANNER: Napapatay a calamay vendor, drug user: San Carlos City police

CANDON CITY – Maysa a drug personality ken adda kasona a robbery ti aglaklako iti kalamay a napapatay iti asideg ti terminal ti maysa a bus transportation idi rabii ti Agosto 9, segun iti kaudian a report ti Candon City police.

Segun iti Candon City police station, nakikoordinarda iti San Carlos City police ket iti record check nga inwayat ti nasao a police station, naammuanda a maysa a surrenderee a drug user ni Joel Garcia y Cayabyab, 39, ken adda kasona a robbery a madama a mabisbista iti korte.

Maipalagip a napaltogan ni Garcia iti abay ti terminal ti Partas Transportation ken pimmusay bayat ti pannakataming ti sugatna iti Candon City Hospital.

Kinuna ti kapolisan ditoy nga agtultuloy ti panagimbestigada iti baet a nagkedked dagiti sumagmamano a napagsalud-sodanda nga aglaklako iti kalamay a makikooperar.

Segun iti maysa a drayber ti traysikel nga agur-uray iti pasahero iti asideg ti terminal, dua a lalaki a nagaruat ti bonete ti nakitana a naglibas iti abagatan a direksion kalpasan ti pannakangegna iti dua a nagsaruno a kanalbuong. Ngem idi pagpirmaen dagiti inbesti-gador iti nasapataan nga statement, nagkedked daytoy nga agpirma.

Kiniddaw pay dagiti inbes-tigador dagiti establisimiento iti asideg ti nakapasamakan ti krimen ngem kaadduanna kadagiti nainstolar a CCTV ti dadael ken saan nga agob-obra idinto a maysa nga establisi-miento nga addaan CCTV ti nagkedked a mangipakita iti footage ti bukodna a CCTV.

Kitkitaen pay dagiti inbes-tigador no adda pakainaigan ti panagsubang ti biktima ken maysa a tricycle driver iti pammapatay.

Idi Agosto 13, nagturong ni Bernard Garcia, kabsat ti biktima, iti Candon police station ket impalgakna a nakariri ni Joel Garcia ti maysa nga agpaspasada iti traysikel a residente iti Barangay Paras, Candon City.

Babaen ti tulong ni Barangay Chairman Darius Busina, natuntonan dagiti polis ni Greg Frando, 44, a nangannugot a nagsubangda ken ni Joel Garcia idi Agosto 3, 2017.

Nupay kasta, kinuna ni Frando a dimmawat iti dis-pensar iti kabigatanna ket inawat met ni Garcia. (Tawid News)

Comments are closed.