Footer

Naparti nga aso, viral iti Facebook

STO. DOMINGO, Ilocos Sur – Nagbalin a viral ti naiposte iti social media idi bigat ti Agosto 16 a pannakaparti ti maysa nga aso.

Iti report a dimmanon iti police station ditoy, naiposte ti pannakaparti ti aso iti Facebook account ket nagbalin a viral daytoy kadagiti netizen.

Mapapati a ni met laeng Orlando del Mundo y Talania, 36, naasawaan, security guard ken residente iti Barangay Cabigbigaan, ditoy nga ili ti nangiposte iti pannakaparti ti aso idi agarup 8:00 ti bigat ti Agosto 13 sadiay Barangay Cabigbigaan iti balay ti nasao a guardia.

Iti panagpalutpot dagiti polis, naammuan a dua ti katulongan ni Del Mundo a nangparti iti aso.

Inannugot ni del Mundo a kiniddawna ti tulong ti sumagmamano a gayyemna idi pinar-tida ti aso ket innagananna dagitoy a da Joseph Baligod y Cepedoza, 34, naasawaan, ken residente iti Barangay Cabigbigaan ken Tereso Tabrilla y Tagorda, 50, awanan asawa ken residente iti Sitio Quimbanban, Barangay Binalayangan, Sto. Domingo, Ilocos Sur.

Iti pinirmaanda a sworn statement, imbatad da Baligod ken Tabrilla a tinulonganda laeng ti guardia a nangparti iti aso.

Iti pannakaisurat daytoy, awan pay ti kaso a naisaklang maikontra ken ni del Mundo.

Ngem segun iti maysa nga autoridad, maysa daytoy a panagsalungasing iti RA 8485 wenno Animal Welfare Act of 1998.

Kas sagudayen ti RA 8485, maisalungasing ti panangpatay iti aniaman nga animal malaksid iti baka, baboy, kalding, karnero, poultry, koneho, nuang, ken kabalio malaksid laeng no mapatay dagitoy babaen iti ritual ti pammati.

Asinoman a maduktalan a naglabsing iti nasao a linteg ket mapatawan, saan laeng a multa no di pay pannakabalud. (Tawid News)

Comments are closed.