Footer

PIA info kiosk, nailunsad iti Vigan Heritage Village

VIGAN CITY– Tapno maikkan ti nawadwad nga inpormasion dagiti agindeg ken bisita iti probinsia maipanggep kadagiti programa, proyekto ken serbisio iti gobierno, nailunsad iti Calle Crisologo iti Heritage Village ditoy siudad itay Agosto 18, ti maysa nga information kiosk ti Philippine Information Agency (PIA).

Mismo a ni Vigan City Mayor Juan Carlo Medina ti kangrunaan a sangaili iti pannakailunsad ti information kiosk.

Gagem daytoy a pannakaipatakder ti info kiosk ditoy a lugar ti pannakaiwaragawag maipanggep iti Association of Southeast Asian Nations (ASEAN) a maselebraran ti maika-50 nga anibersariona ita a tawen.

Maipalagip a sangapulo a pagilian a pakaibilangan ti Pilipinas, Brunei Darusalam, Cambodia, Indonesia, Lao PDR, Malaysia, Myanmar, Singapore, Thailand ken Vietnam ti nangipatakder iti ASEAN idi Agosto 8, 1967.

Maikadua daytoy nga info kiosk a maipatakder iti probinsia, immuna sadiay Baluarte Zoo idi Hunio 29 nga inatenderan ni Bise Gobernador Jeremias “Jerry” Singson, Mayor Juan Carlo S Medina, dagiti kameng ti lokal a media, ken ahensia ti nasional a gobierno.

Babaen ti tulong dagiti nagduduma nga ahensia iti gobierno, maikkan iti kangrunaan nga inpormasion dagiti tattao maipanggep kadagiti serbisio a kasapulan a maidanon kadagitoy.

Nalatak ti Calle Crisologo iti intero a lubong a bisbisitaen dagiti turista gapu ta ditoy a makita dagiti balbalay a Kastila a mangipakpakita iti arkitekto ti Europa, Asia ken Ilokana.

Manipud idi nagbalin a maysa a World Heritage City idi 1999 babaen iti UNESCO, nagbalinen a pagdudupudopan dagiti tattao a pagpasiaran ti Vigan. Ad-adda nga immadu dagiti agpasiar ditoy idi nagbalin a maysa kadagiti 7 New Wonder Cities of the World idi 2014.

Naipanagan ti gudua kilometro a kalsada ti siudad ken ni Marcelino Mena Crisologo, mannurat, ken politiko. Naiyanak iti Vigan idi Nobiembre 11, 1844, maysa ni Crisologo kadagiti nangibagi iti probinsia iti Malolos Congress, ken nagpirma iti Malolos Constitution.

Kaunaan a gobernador ti probinsia, pinagbalin ni Crisologo ti Vigan a nalatak iti tay-ak ti arte ken literatura-Ilocano. Kas dramatista, sinuratna ti zarzuela a “Codigo Municipal”. Ti “Mining” wenno “Ayat ti Kararwa” ket maikumparar iti ‘Noli Me Tangere” a nobela ni Jose Rizal. Impaulogna iti Iloko ti Don Quixote kas Don Calixtofaro de la Kota Caballero de la Luna. Nagtultuloy a nagsurat kadagiti komedia ken zarzuela ken nangitandudo iti arte ken literatura-Ilokano kalpasan ti panagtakemna a gobernador. Natay idi Hulio 5, 1927. (Tawid News, manipud iti report ni Imelda C. Rivero, PIA 1, Ilocos Sur)

Comments are closed.