Footer

SINURSURAN: Dagiti Babassit a Kayaw ken Karit iti Panggedanna

Kolum ni Jobert M. Pacnis

(Umuna iti dua a paset)

Employees will work harder for you, and perform better, if you give them tasks they find meaningful and morally worthwhile.”

Kapanunotan dayta ni Aristotle, maysa a pilosopo ken kalaingan idi panawenna. Ni Plato a maysa met laeng nga am-ammo a pilosopo ti nagbalin a titserna.

Nabagas dayta a sinao ni Aristotle. Dakkel ti pakainaiganna iti agdama a mapaspasamak kadagiti nadumaduma a kita ti panggedan.

Ngem kenkuana, iti kapaliiwanna, saan a mapaspasamak ti kasta. Kitaen laengen ti isyo iti underemployment iti pagilian. Nagadu ti agtrabtrabaho iti saan a mayannatup iti inadalda. Ti nakas-ang, ar-aramaten daytoy dagiti employer a panggundaway kadakuada. Napia koma no sakbay a maipasungalngal iti trabaho ti maysa a mangmangged nga awan pamalpalatpatanna, maisuro nga umuna kenkuana ti aramidenna. Ikalukag ti yaatendarna kadagiti training wenno seminar. No saan, ikkan ti panawenna nga agadal, mangadal kadagiti rumbeng nga aramidenna.

Mamati ketdi a para iti panagdur-as ti maysa nga indibidual ti pannakaisubona iti baro a trabaho. For development, kunada. Narigat itan no maysa laeng a banag ti paglaingan. Masapul ti panangsursuro kadagiti baro iti aglawlaw. No mabalin, ammuen amin a kabaelan a trabahuen.

Malagipna ti sangkakuna ti kaduana iti pagadalan: “Masapul ti adu nga ammo ita, sir. Saan a maymaysa laeng ti pagtaudan ti pagbiag. Nadaras itan ti taray ti panawen.”

Nga agpayso met. No agpataypatay kadagitoy a panawen, talaga a maudi iti biahe. Mabati a nakamulagat.

Ngem sabalin a saritaan para kenkuana no maipanggep ti panagisuro. Duma laeng no isurona ti major-na. Maipakatna ti amin nga ammona. Saan nga agkarkarawa iti ibagana tunggal ibisikna ti adal kadagiti ubbing.

Ta master-na ngarud!

Ngem iti kapaliiwanna, adu ita ti agrekreklamo a mannursuro ta saan a mayannatup iti major-da dagiti isursuroda a suheto (subject) iti agdama.

Dakkel a parikut dayta aglalo iti hayskul. Kasano ngarud a maipaayda ti umisu nga adal kadagiti ubbingda?

Saan a bale iti elementaria ta uray ania ti iggeman ni ma’am wenno sir a subject, kabaelanda latta. Ta talaga ngarud nga inadalda dayta. Awan ti medmedior!

Ngem sabali iti hayskul. Saan nga iti dida ammo nga isuro ti saanda a major. Ngem masapul a natennebda, inadalda dagiti isuroda. Isu ngarud nga adda major ti tunggal maysa kadakuada.

Ti maysa a kas kadakuada, saanda a naawat a mangisuro tapno agkarkarawa laeng.

Wen, mannursuroda, masapul nga ammoda koma amin. Ngem kas nasaon, para kenkuana, nasaysayaat met laeng no ti bukodna a major ti isurona uray saan nga amin.

Nabayagen nga agisursuro iti dina major. Ngem okey laeng kenkuana. Ti napateg, adda latta major-na nga isursurona a karapin dagiti saanna a major. Maipakatna met laeng ti inadalna. Kangrunaanna, saan nga agkarkarawa. Ammona ti amin a suli ti ibagbagana. Saan a maipasuli dagiti ubbing no adda saludsodenda.

Malagipna, idi damona ti agisuro iti pribado a pagadalan iti ilina, dagiti kadadagsenan a suheto dagiti iggemna. Physics ken Math dagiti 4th Year, ken maysa a Math iti lower years. Nupay arig awan idi ti bakantena, nasurok a tallopulo nga oras iti makalawas nga agisuro, nalag-an latta kenkuana ta pagaayatna dagita a suheto (major-na). Kasla dina marikna ti kettang ken bannog.

Iti panagakarna iti sabali manen a pribado a pagadalan, Math ti Grado 7 ken Grado 9 ti iniggamanna. Naikkan pay iti MAPEH ken TLE. Saanna la koma a kayat idi ngem asino koma nga agkitakit? Baka ikkatenda. Nagrigat met ngarud ti awan panggedanna.

Isu nga uray agsallapid dagiti sakana nga agsala ken pumalaud-pumadaya ti timekna, kapilitan a nagisuro iti MAPEH. Saan a bale ti TLE ta liniana pay bassit dayta. Nalaing nga agmulamula ken adda pamalpalatpatanna iti Agriculture gapu kadagiti basbasaenna iti magasin.

Iti panagisurona iti dina major, aklonenna a nagbalin a tulbek daytoy iti pannakalukat ti sabali a lubong kenkuana. Adu dagiti bambanag a naammuanna. Kultura ti nadumaduma a pagilian kangrunaan ti pagilianna. Nanayonan pay ti ammona iti Agrikultura.

Napayaman ta nakastrek iti public high school. Nangrugi a nagisuro a Math ti Grado 8 ken Grado 9 dagiti suhetona. Sa adda pay Aralin Panlipunan—a naikkat met laeng idi agsimsimpa ti iskediulda ta apagisu idin nga adda ‘tay baro nga AP major.

(Adda tuloyna)

Comments are closed.