Footer

Dap-ayan Ilocos Sur, nailunsad

VIGAN CITY – Tapno mapapigsa ti pannakaipakaammo ti nadumaduma a programa ken serbisio dagiti ahensia ti gobierno kadagiti umili, inlunsad ti Philippine Information Agency (PIA) iti Ilocos Sur ti “Dap-ayan Ilocos Sur” media forum babaen iti simple a seremonia itay nabiit iti kapitolio ditoy.

Ni Gobernador Ryan Luis V. Singson ti kangrunaan a sangaili iti pannakailunsad ti “Dap-ayan Ilocos Sur”, idinto a ni Deputy Regional Director ti PIA Region I Freddie G. Lazaro ti nangilawlawag dagiti pakaseknan ti baro a programa ti PIA.

Insuno ni Lazaro iti nasao a pasken ni agdama a Regional Director ti PIA iti Rehion prensa iti Ilocos Sur.

Babaen iti “Dap-ayan Ilocos Sur,” maikkan ti gundaway dagiti maimbitaran a hepe ti ahensia ti gobierno a mangipakaammo ken mangilawlawag kadagiti programa ken serbisioda iti sanguanan dagiti kameng ti media iti probinsia; ken maikkan met ti gundaway dagiti kameng ti media nga agsaludsod kadagiti opisial ti gobierno tapno naan-anay a malawlawagan dagitoy a programa wenno proyekto,” inlawlawag ni Lazaro.

Amin a programa ti gobierno a makaited iti pagsayaatan ti panagbiag dagiti umili ken dagiti programa ti gobierno a mangtagiben iti nabaknang a kultura Ilokana ti kangrunaan a topiko a pagsasaritaan iti taripnong,” innayon pay ni Lazaro.

Kabayatanna, dinayaw ni Gobernador Singson ti PIA-Ilocos Sur gapu iti panangilun-sad ti ahensia iti “Dap-ayan Ilocos Sur” media forum tapno adda pakaadawan ken pakaammuan kadagiti agdama a programa dagiti naduma-duma nga ahensia ti gobierno iti probinsia.

Inrusat ti PIA-Ilocos Sur ti nasao a programa babaen ti pannakitinnulong ti opisina ti Provincial Information Office (PIO) ti kapitolio.

Maysa pay a panggep ti “Dap-ayan Ilocos Sur” ket isu ti panangpapintas ti langen-langen amin a kameng ti media iti Ilocos Sur ken kadagiti amin nga opisial ti gobierno iti probinsia.

Maisayangkat ti regular a “Dap-ayan Ilocos Sur iti “media lounge” ti PIO tunggal umuna ken maudi a Hwebes kada bulan a marugian inton Septiembre.#