Footer

Pera Hub Money Transfer, naserrek; P170K iti vault nakurimes

TAGUDIN, Ilocos Sur – Makalawas kalpasan ti pannakapasamakna, awan pay ti suspek ti kapolisan mainaig iti panagtakaw iti maysa nga establisimiento ditoy a naireport a naserrek idi agsapa ti Agosto 21.

Ngem kuna ti kapolisan nga agtultuloy ti panagimbestigada mainaig iti nasao a robbery.

Naammuan ti Tawid News nga agdagup iti US$750.00 ken sumurok kumurang a P125,000.00 ti natakaw iti Pera Hub Money Transfer.

Idi agarup 8:30 ti bigat ti Agosto 21, inreport iti polis ni Rosalyn Ruiz y Subagan, 25, naasawaan, teller ti nasao nga establisimiento, ken residente iti Barangay Bacsayan, Sta. Cruz, Ilocos Sur, a naduktalanna idi aglukat iti opisinada a natakawan ti pagtrabtrabahuanna a Pera Hub Money Transfer a masarakan iti Barangay Del Pilar.

Kinuns ni Ruiz a puersado a naluktan ti vault ket awanen dagiti linaonna a kuarta idi umuneg iti opisinada.

Iti panagimbestiga dagiti polis, nakastrek dagiti di pay nabigbig a suspek babaen ti panangdadaelda iti nakongkreto a hollow block iti likud ti pasdek a nakainstolaran ti air condition. Ditoy met laeng ti mapapati a rimmuaran dagiti suspek kalpasan ti panagtakaw.

Tagtagiuray ti kapolisan ti resulta ti panangproseso ti SOCO iti crime scene para iti posible a pannakaala dagiti lemma ti ramay dagiti nangisayangkat iti panagtakaw. (Tawid News)