Footer

Back rider, natay; 2 nagmaneho nasugatan iti aksidente

TAGUDIN, Ilocos Sur – Natay ti back rider idinto a nasugatan dagiti drayber dagiti dua a motorsiklo a nainbolbar iti aksidente iti national highway sadiay Barangay Dardarat, ditoy nga ili idi Agosto 3.

Naitaray iti Ilocos Sur District Hospital, Barangay Bio, Tagudin, Ilocos Sur ni Michael Angelo Pagayatan y Abundo, 17, nagmaneho iti Yamaha Mio Soul 125, estudiante ken residente iti Barangay Baracbac, Tagudin, Ilocos Sur, ken ti kinasakayna a ni Leonard Lopez Calumpit, 15, estudiante, ken residente iti Barangay Las-ud, Tagudin, Ilocos Sur ngem saanen a naiyabot ti biag ni Calumpit.

Iti met Ilocos Training Regional and Medical Center, Parian, San Fernando City, La Union, ti nakaitarayan ni Mark Louie Lopez Villar, 16, nagmaneho iti SYM motorcycle ken residente iti Barangay Las-ud, Tagudin, Ilocos Sur.

Segun iti report, agpada nga agpaabagatan dagiti dua a motorsiklo, umun-una ti SYM motorsiklo idi mapasamak ti aksidente.

Mapapati nga inobertekan ni Villar ti sarsarunuenna a motorsiklo, simmaruno ti MIO Soul a minaneho ni Pagayatan ngem nadiskarkulo daytoy ti distansia ket nadungparna ti SYM motorcycle a puon ti nakaikrasanda iti kalsada ken nakadundunoranda a tallo.

Kinuna dagiti polis a pasig amin a menor de edad dagiti nainbolbar iti aksidente. Malaksid nga awan ti plaka ti motorsiklo ni Pagayatan, awan pay ti helmet ken lisensia nga agmaneho.#

Comments are closed.