Footer

BANNER: Strike 2 iti menor de edad a nagtakaw iti motorsiklo

STO. DOMINGO, Ilocos Sur – Awan ti nagnaan dagiti patigmaan iti daytoy a menor de edad agsipud ta inulitna manen ti nangitaray iti motorsiklo a dina kukua idi Agosto 3, 2017.

Iti inwayatda a pursuit operation, natiliw dagiti nagtipon a kameng ti kapolisan ti Sto. Domingo ken San Vicente ni Diether Tabut y Versoza, 16, Grade 10 student ti Naglaoa-an National High School ken residente iti Barangay Padu Chico, ditoy nga ili kalpasan nga inabandonarna ti tinakawna a motorsiklo iti barangay road a nagbeddengan dagiti dua a nadakamat nga ili idi agarup 4:30 ti malem ti Agosto 3.

Mapapati a tinarayan ni Tabut ti motorsiklo gapu ta naawanan iti gasolina.

Sakbay daytoy,  idi agarup 9:40 ti bigat ti nadakamat met laeng a petsa, inreport ni Chester Teñoso, 31, naa-sawaan, welder, ken residente iti Barangay Cabigbigaan, Sto. Domingo, iti polis station ditoy a mapukpukaw ti RUSI 150 motorcycle nga imparkingna iti sanguanan ti Sunshine Mirasol Inn sadiay Puerto Beach, Barangay Calay-ab, ditoy met laeng nga ili idi agarup 12:00 ti tengnga ti rabii ti Agosto 2.

Mapapati a naitaray ti motorsiklo iti nagbaetan ti tengnga ti rabii agingga iti pannakaduktal ni Teñoso a natakaw ti motorsiklona.

Positibo a binigbig ni Teñoso ti naabandonar a motorsiklo ket pinaneknekanna babaen dagiti dokumento nga isu ti agtagikua iti nasao a lugan.

Daytoy ti maikadua a gundaway a nangitaray ni Tabut iti motorsiklo.

Maipalagip a ni Tabut ti suspek a nangitaray iti maysa a motorsiklo iti Naglaoa-an National High School idi Hulio 20, 2017.

Naipaima ni Tabut iti opisina ti MSWD para iti case study. (Tawid News)

 

Comments are closed.