Footer

EDITORIAL: Ballaag kadagiti Opisial ti Gobierno ti Napasamak iti Pamilia Parajinog

MAIBILANG a ballaag ken pangta kadagiti opisial ti gobierno a maatap nga agisaysayangkat kadagiti kriminalidad ti napasamak a pannakapapatay dagiti kameng ti Pamilia Parojinog sadiay Ozamiz City iti kampania ti gobierno mainaig iti illegal a droga ken dadduma pay a krimen nga isardengdan ti dakes nga aramidda.

Napapatay dagiti kameng ti Philippine National Police nga indauluan ni Ozamiz City Chief of Police Jovie Espenido da Mayor Reynaldo Parojinog, ti asawana a ni Susan, dagiti kabsatna a da Misamis Occidental Board Member a ni Octavio Jr. ken babai a kabsatda a ni Mona, ken dadduma pay a kabagian ken kakaduada. Napasamak ti insidente kabayatan ti pannakaiserbi ti search warrant para kadagiti illegal nga armas a nakalemmeng kadagiti pagtaengan dagiti kameng ti Pamilia Parojinog idi parbangon ti Hulio 30, 2017.

Naaresto pay dagiti dua nga annak ti Mayor a da Ozamiz City Vice Mayor Nova Princess Parojinog Echaves, ken Reynaldo Parojinog Jr., ken naidarum ken nakakulongdan sadiay PNP Custodial Center iti Camp Crame, Quezon City.

Agdagupen iti 16 dagiti napapatay iti dayta nga operasion ti PNP kalpasan a maysa kadagiti kabagian ti Pamilia Parojinog a nasugatan ti natay iti ospital. Awan met ti natay wenno nakaro a nasugatan kadagiti polis a nangiwayat ti operasion.

Inrakurak ni Chief Insp. Espenido a lehitimo ti operasionda ken shootout ti napasamak, ken immuna a nagpaputok dagiti pasurot dagiti Pamilia Parojinog ken adda pay nagbato ti granada, ket bimmales ken dinepensaanda laeng dagiti bagida. Nakakompiskarda kadagiti armas, bala ken eksplosibo, illegal a droga ken dakkel ti kantidadna a kuarta. Nagpositibo met ni Mayor Parojinog ken dagiti pito a kaduana iti powder burns iti paraffin test a mangipakita a nagpaputokda iti paltog.

Impetteng dagiti saksi ken kameng ti Pamilia Parojinog ken dagiti kakaduada a saan a pudno ti pammabasol dagiti polis, ken planted dagiti naalada nga ebidensia. Mangisayangkat met ti PNP Internal Affairs Service ken Commission on Human Rights iti imbestigasion no adda dagiti nalabsing a paglintegan.

Dinependeranen da Presidente Rodrigo Duterte ken PNP Chief Director General Ronald de la Rosa dagiti polis a nainaig iti operasion a nakatayan dagiti kameng ti Pamilia Parojinog ken dagiti kakaduada a lehitimo ti operasion. Nagballaagda kadagiti opisial ti gobierno nga adda pakainaiganna iti illegal a droga ken dadduma pay a krimen nga awan ti santuenda iti panangipakatda ti linteg.

Mairaman ni Mayor Parojinog ken ti anakna a Bise Mayor kadagiti 150 nga opisial ti gobierno nga innaganan ni Presidente Duterte nga adda pakainaiganna iti illegal a droga idi Agosto 7, 2016. Isuna ti kaudian a mayor a napapatay kabayatan ti panagakem ni Presidente Duterte ken panangiyusuatna ti nainget a kampania kontra illegal a droga.

Idi Oktobre 2016, napapatay iti PNP checkpoint ni Saudi Ampatuan, Maguindanao Mayor Samsudin Dimaukom iti pannakirangetda ken dagiti pasurotna kadagiti polis a nangsitar kadakuada gapu iti maatap a panangibiaheda iti illegal a droga.

Idi Nobiembre 2016, dagiti operatiba ti PNP Criminal Investigation and Detection Group iti Region 8 nga indauluan ni Supt. Marvin Marcos ket napapatayda ni Albuera, Leyte Mayor Rolando Espinosa, iti seldana a nakakulonganna gapu iti maatap a pannakainaigna iti illegal a droga. Ni met laeng Chief Insp. Espenido idi ti hepe sadiay Albuera a nangiwayat ti raid iti balay da Espinosa ken nakakombinsir kenkuana a sumuko.

Nagduduma ti panirigan dagiti umili iti napasamak kadagiti Pamilia Parojinog a nagbalin a nalatak iti pagilian gapu iti pannakainaigda iti organized-crime group a Kuratong Balaleng. Agdepender iti pammati dagiti umili no inosente wenno nagbasol dagiti napapatay ken naaresto iti dayta nga operasion. Adda dagiti mamati nga adda pakainaigan dagiti Pamilia Parojinog iti illegal a droga ken dadduma pay a krimen. Adda met dagiti agkuna nga inosenteda kadagiti krimen a maipabpabasol kadakuada.

Saan a mailibak ti kinapudno nga adda dagiti lokal nga opisial ti gobierno nga adda pakainaiganna iti illegal a droga ken nagduduma a krimen, ngem saanda a magargaraw gapu iti saad ken impluensiada. Kadagiti pagturayanda, maibilangda a kasla didiosen a pagkamangan dagiti agkasapulan iti tulong, ken pagbutbutngan dagiti mangtubngar kadagiti dakes nga aramidda.

Maysa nga ehemplo ket ti pannakatiliw ken pannakabalud iti tungpal biag ni sigud a Panukulan, Quezon Mayor Ronnie Mitra a natiliw a nangbayabay iti ambulansia a nagkarga iti 498 a kilos ti shabu idi pay Oktobre 2001. Dagitoy nga opisial ket ar-aramatenda ti turayda ken ti pammarang a kinamanagtulongda tapno mailinged dagiti dakes nga aramidda.

Agdagup iti 150 dagiti innaganan ni Presidente Duterte iti listaan dagiti opisial nga adda pakainaiganna iti illegal a droga. Adu kadagiti nainaganan ti saan a nangaklon iti pammabasol. Kalpasan ti makatawen nga innaganan ida ti Presidente, nakaurnong koman ti PNP ken National Bureau of Investigation kadagiti nabileg nga ebidensia tapno maidarumda iti husgado ken no mapaneknekan nga awan-panagdudua a nagbasolda ket madusa dagita nga opisial nga agar-aramid iti krimen.

Nasken ti panagdalan iti umno a proseso ti linteg dagiti suspek ken akusado. Masurot koma ti linteg ken nasken a maliklikan dagiti nadara nga operasion ken pannakairamraman dagiti inosente a tattao. Ngem ti sistema ti hustisia iti Pilipinas, maballikog ti linteg no maisaklang dagiti tattao a nabileg. (Eden A. Alviar)

No comments yet.

Leave a Reply