Footer

EDITORIAL: Illegal Drugs, Smuggling ken Kurapsion iti Bureau of Customs

AGTALINAED wenno maikkatto ngata iti saad dagiti nangato nga opisial ti Bureau of Customs iti sango dagiti kontrobersia a sangsanguen ti ahensia gapu ti pannakaipuslit ti dakkel a bulto ti illegal a droga ken panagraira ti kurapsion iti ahensia?

Umad-adun dagiti kongresista ken senador dagiti umaw-awag ti panaglusulos ni BOC Commissioner Nicanor Faeldon ken dagiti babaenna iti sango ti dakkel nga eskandalo a sangsanguen ti ahensia iti pannakaipuslit iti Pilipinas ti 604 kilos ti illegal a droga nga aggatad iti P6.5 billion manipud China, ken alegasion ti kurapsion babaen ti pasuksok wenno tara system tapno maiserrek dagiti kargamento ken kontrabando iti pagilian.

Immunan a pinaglusulos ni Surigao del Norte 2nd District Representative Robert Ace Barbers ni Comm. Faeldon ken dagiti maseknan a pasurotna gapu ti pannakaipuslit ti illegal a droga ken agtultuloy a kurapsion iti BOC ta dayta ket ibabainda ni Presidente Rodrigo Duterte a nangdutok kadakuada, ken daddadaelenda ti nainget a kampania ti Presidente maikontra iti illegal a droga ken kurapsion.

Idauluan ni Rep. Barbers ti Committee on Dangerous Drugs iti House of Representatives nga agisaysayangkat ti imbestigasion ti pannakaiserrek ti P6.5 billion ti pategna a droga iti BOC Manila Port a nasamsam iti dua a bodega sadiay Valenzuela City, Metro Manila idi Mayo 26, 2017. Nasukalan a naipalaon iti lima a metal cylinder dagiti shabu wenno methamphetamine hydrochloride manipud China.

Patien met ni Senator Richard Gordon, Chairman ti Senate Blue Ribbon Committee a ti adu a shabu a natiliw sadiay Valenzuela City ket nakalusot iti BOC gapu ti panagkukumplot dagiti opisial ti ahensia ken dagiti Chinese nationals ta nagdalan daytoy iti BOCmonitoring ken naglasat iti green wenno express lane a mailabsing iti pagannurotan a nainget a pannakainspeksion dagiti kargamento manipud China ken dagiti nabiit pay nga importers.

Mamati ni Sen. Gordon ken dagiti kaduana iti komite a nasken ti pannakaikkat dagiti maseknan nga opisial ken agpapaay iti BOC ta saan a nakalusot ti kontabando no awan ti nakikumplot nga opisial ken agpapaay iti ahensia a makunkuna a maysa kadagiti kakaruan ti kurapsion nga ahensia ti gobierno iti pagilian.

Nagpalawag metten iti Senado ni Customs broker Mark Ruben Taguba a nangbayabay iti shipment, ket adu nga opisial dagiti inakusaranna a nadakamat dagiti naganda nga umaw-awat iti pasuksok tapno mapadaras wenno makalusot dagiti kargamentoda. Inramanna pay dagiti negosiante a Richard Tan ken Kenneth Ong nga adda pakainaiganna iti shipment, ken nagpalawagdan iti Senado ken pinaglibakanda iti pannakainaigda iti illegal a droga.

Nagbalin a sentro ti kontrobersia da Comm. Faeldon ken dagiti pasurotna iti BOC a kaaduanna ket sigud a kameng ti Armed Forces of the Philippines ken Magdalo Group a nairaman iti Oakwood Siege idi 2003.

Naglusulosen da Imports Assessment Service Director Milo Maestrecampo ken Investigation and Intelligence and Investigation Service Director Neil Anthony Estrella.

Impatangken ni Comm. Faeldon a kas soldado ket ibilangna a saan a trabaho ti kaaddana iti BOC, ngem mision a saan a mabalin a sanudanna. Impettengna a ni laeng Presidente Duterte a nangdutok kenkuana ti makaikkat kenkuana iti akem. Patienna pay a bumalbales laeng kenkuana dagiti politiko nga adda interesna iti BOC a pinaayna dagiti kiddawda kenkuana.

Nagkitan da Duterte ken Faeldon ngem awan pay ti pangngeddeng ti Presidente no agtalinaed wenno saan ti BOC Commissioner. Inrakurak met ni House Speaker Pantaleon Alvarez nga imbilin ti Presidente a leppasenda ti inbestigasion ken mangrirekomendada iti aksion tapno adalenna a nasayaat sakbay ti pangngeddengna.

Adu dagiti masayangan ti mapaspasamak iti BOC ta iti panangdutok ni Pres. Duterte ken ni Comm. Faeldon ken dagiti kameng ti Magdalo Group nga idealismo a sigud a nagkudeta a soldado ket magibusanen ti kurapsion iti dayta nga ahensia. Ngem adu dagiti nadismaya ta agtaltalinaed pay laeng dayta a bulok a sistema. Daksanggasat ta saan laeng a kadawyan a kargamento dagiti nakalusot iti dayta a pasilidad ti gobierno a guguardiaan dagiti susuelduan ti gobierno ngem adu nga illegal a droga.

Dakkel a mantia dayta nga insidente iti kampania ti gobierno kontra illegal a droga ken kurapsion.

Kasanon ti kaadu dagiti illegal a droga a naggapu iti China ti napalusot kadagiti Puerto ti BOC? Kasanon ti kadakkel ti kantidad dagiti nakastrek nga illegal a droga a nailaklakon kadagiti drug users?

Agbuggo man iti ima da Comm. Faeldon ken dagiti kakaduana, saanda a malisian ti panagdudua dagiti umili kadakuada. No inosenteda kadagiti alegasion, mabalin nga agkurangda iti kabaelan tapno maakemda dagiti responsibilidadda.

Idi nabiit pay a nadutokan ni Faeldon a BOC Commissioner ket adun dagiti nagdudua iti kabaelanna gapu ta kurang ti padas ken adalna nga agtakem iti nangato a posision. Kadawyan a nagturpos isuna iti Engineering iti National University ken sigud a kapitan ti Philippine Marines a maysa a kameng ti Magdalo Group. Kas kapitan, maibilang dayta a company grade iti AFP wenno station grade iti Philippine National Police wenno hepe dagiti bassit a police station. Ngem gapu ta tinalek isuna ti Presidente ket awan ti nangkuestion ti pannakadutonakna.

Iti agdama a mapaspasamak iti BOC a nagadun a kontrobersia, saan koman nga urayen dagiti opisial ti panangikkat kadakuada ti Presidente. No addaanda iti delicadeza, isudan a mismo ti umikkat iti saad tapno makapili ti Presidente ti tumutop nga agakem iti dayta nga ahensia. (Eden A. Alviar)

Comments are closed.