Footer

SINURSURAN: Dagiti Babassit a Kayaw ken Karit iti Panggedanna

Kolum ni Jobert M. Pacnis

(Maudi iti dua a paset)

Ngem ti saanna a malipatan, ti panagisurona iti Values Education. Kasla man maalumiim idi. Apay, maitutop ngata kenkuana nga iggaman, isurona dayta a suheto? Maikari ngata?

Adda ditan. Isu nga iti aramid, panagsao, ken panaggungunay, nagbalin a mapagpiaran. Agingga’t mabalin, awan ti masao dagiti adalanna.

Idi kuan, Physics ken Math dagiti nagbalin a suhetona. Sa naisaruno a naikkan iti Arts ken TLE. Ngem kas mannursuro, saan a nagrekreklamo uray idi maymaysan ti Math-na, ken naikkaten ti Physics kenkuana (ta isu daydin panawen a nasuktan ti curriculum gapu iti K-to-12). TLE ti nagbalin a kadkadua ti Math 7 a suhetona ken maysa iti Senior High School (nupay saan a nagaplay iti SHS).

Nupay kasta, ragsak ti ipapaay dagitoy kenkuana ta maipakatna ti ammona iti Agrikultura aglalo ket addan major dagiti ubbing iti suhetoda a TLE. Agpilida ti kayatda: Beauty Care, Foods, Computer Hardware Servicing wenno Agriculture.

Ket bayat ti panagiggemna iti TLE, napagbalinna a pagnumaran ti bassit a bakante a lote iti amianan ti pagadalanda a dumna iti baybay. Idi damona, naal-alimadamadna a saan a makapagbalin iti mula dagiti ubbing gapu iti apgad nga iparrais ti angin.

Ngem kunana a saan a tubeng dayta ta malagipna nga idi ubing pay, asideg met laeng iti baybay ti nagmulmulaan ni tatangna iti karabasa, utong, tabungaw ken dadduma pay a natnateng. Ti inaramidna, inasikasona ti alad. Impamaysana ti nagalad kadagiti sanga ti kawkawwati ta daytoy ti nalaka nga agbiag. Sa patubo a nadumaduma a klasena a niog.

Gapu ta awan pay TLE-na idi kadagita a panawen, awan ngarud ti ubbingna a pagmulaenna. Ti dati a pagbasuraan a nagkasamekan, saan a ginaraw dagiti adda TLE-na. Ti inaramidna, binukbukodanna nga inan-anusan a dinalusan uray sangkailgat laeng sa pay laeng nagsulian.

Inggiddanna ti nagdalus idi rugian dagiti ubbing ti agdalus kadagiti area-da tapno adda kadkaduana iti asideg. Ketdi, awan timmulong kenkuuana ta makumikom dagitoy a mangisagsagana iti plot a pagmulaanda.

Pinadasna ti nagmula iti lima kadisso a kabatiti, sangapulo kadisso nga utong ken tallo kadisso a karabasa (ta talaga man met a nailet ti yanna). Ken bassit a paguggotan a kammotit. Ken tarong kadagiti bettak a baldi a dati pagsaksakdo dagiti ubbingda iti pagadalan nga inanusanna a kinargaan iti daga

Tunggal bakantena, saan nga agtalinaed iti office. Mapan iti bukodna a garden. Agdalus, agsibug no kasapulan, ken mangkita no adda agdadael nga insekto kadagitoy. Dungngo a napalalo ti impaayna kadagiti mulana.

Dagiti kaabayna a garden dagiti ubbing, kalpasan a nakamulada, binaybay-andan. Adda dita a natikagda, nagpiestaan dagiti insekto ken nagkaruotan.

Saan a napupuotan, nangrugin nga agapit. Inaldaw nga agiyawid iti sabong-karabasa. No saan, utong ken kabatiti. Permi nga apalda kenkuana. Nasurok a makabulan a nalibre ti sidada a nateng.

Iti sumuno a tawen, naiteden kenkuana ti TLE. Insurona dagiti ubbing no kasano nga asikasuen dagiti mula. Saan met a napaay. Napadasan dagiti ubbingna ti nagiyawid iti bunga ken sabong dagiti mulada. Ken bagas ken uggot ti kammotit. Pati nagannak, daydi inyaladda a balanghoy, inapit dagitoy idi nag-Brigada Eskuwela-da.

Ita, ragsak ti marikriknana. At least, napaneknekanna nga adda met inalatna iti uray saanna a major.

Ngem adda latta pait iti barukongna. No kaano pay a naitulodna, iti umuna a gundaway iti pagadalanda, iti Finals dagiti nakikontes iti MTAP (a dati nga agpatinggada laeng iti District level) nga ubbingda nagpaayanna a coach dagiti adda iti Grado 7, isu pay ti pannakaikkat kenkuana ti Math a suheto. Naibaon pay a nag-training iti Aralin Panlipunan 10, ta saan a kinayat ti agisursuro kadayta a suheto ti napan, a kellaat sakbay a naglukat ti klase. Ngem AP-9 met ti naited a suhetona idi sumangpet a naggapu iti training. Sa pay naikkan iti suheto iti SHS a dina pulos inaplayan ken ninamnama.

Ngem kas iti dati, asino koma nga agreklamo. Comply before you complain, kunada ngarud. Kunkunaenna laengen iti panunotna, nalabit naikeddeng a kasta tapno adu pay dagiti banag a maammuanna, saan laeng nga iti lubong ti Matematika a major-na.

Sabali manen a pannakidangadang. Ngem siaarakup kadayta a dangadang. Itedna latta ti amin a kabaelanna para kadagiti ubbing.

Paneknekanna man ketdi a saan a pudno iti amin a panawen ti kinuna ni Aristotle nupay para kenkuana, napipia met laeng nga amang no adda major nga isurona koma.#.

Comments are closed.