Footer

BANNER: 3 lugan, nagsaganad a nabato sadiay Brgy. Dili, Gabur, Sta. Cruz

STA. CRUZ, Ilocos Sur – Kalpasan ti dua a lawas a panagpalamiis dagiti nagatel ti imada, tallo manen a lugan ti nabato sadiay Barangay Dili ken Gabur ditoy nga ili idi Agosto 29 ken 30.

Kas maibatay iti report, tallo a lalaki ti nangubor iti Dominion Bus sadiay Barangay Gabur ditoy nga ili idi agarup 10:40 ti rabii ti Agosto 30 idinto nga agpada nga agmaymaysa laeng a tao ti akingapuanan ti pannakabato ti maysa a Toyota Fortuner ken Partas Bus sadiay Barangay Dili, ditoy nga ili iti nagbaetan ti 2:00 ken 2:10 ti parbangon ti Agosto 29.

Segun iti polis, agdaldaliasat iti agpaamianan a direksion iti national highway a sakup ti Barangay Gabur ti Dominion Bus a minaneho ni Crispin Manuel y Bernardo, 42, idi kellaat a binato ti maysa kadagiti tallo a lalaki a magmagna nga agpaabagatan iti lauden nga abaga ti kalsada ti bus a nakatiruan ti maikadua a tawa iti makannigid ti lugan.

Kabayatanna, kas panangisalaysay ni Gener Ramos y Gabor, 48, empleado iti gobier-no, ken residente iti Barangay Paras, Candon City, agpaamianan a direksion ti luganna a Toyota Fortuner idi nabato iti Barangay Dili idi agarup 1:45 ti parbangon a nakabuongan ti sarming ti windshield.

Kas inreport met ni Felix Ramos y Caspe, 37, residente iti Barangay Abuor, Narvacan, agarup 2:10 iti dayta met laeng a parbangon idi mabato ti Partas Bus a minanehona bayat nga agdaldaliasat daytoy nga agpaamianan iti Barangay Dili.

Naburak ti maudi a tawa iti makannawan a paset ti lugan ti bus.

Agpada a negatibo ti resulta ti panagsawar dagiti nagresponde a polis

Immun-una ngem dagitoy nga insidente, sumagmamano a lugan ti naireport a nabato sadiay Tagudin idi parbangon ti Agosto 23, ken Magsingal idi Agosto 13 ken 16.

Idi agarup 12:40 ti parbangon ti Agosto 23, nagsaganad a nabato iti national highway a sakup ti Barangay Quirino, Tagudin ti dua a Maria De Leon bus a minaneho da Alex Acacio Villanueva, 42, ken Francisco Bayang Pasion, 53 a nakabuongan dagiti sarming dagitoy.

Naireport a maysa a Victorenia Bagaoisan Tarriga, 60, pasahero ti maikadua a bus, ti nagsagrap iti sugat iti kannawan a ramayna ken kammuol iti makannigid a paset ti ulona ket naitaray iti ospital.

Idi Agosto 13, nabato ti Partas bus sadiay Barangay Bungro, Magsingal a nakadadaelan ti windshield daytoy.

Maysa nga Andres Garcia Duldulao, residente iti Barangay Barbarit, ti inaresto dagiti polis ken napilaan iti malicious mischief.

Dua met a bus ti Fariñas Trans ti nagsaganad a nabato bayat ti panagdaliasat dagitoy sadiay Barangay San Clemente ken Barbarit, Magsingal idi parbangon ti Agosto 16.

Nadadael ti windshield dagiti dua a lugan.

Maysa a Victorino Viernes y Cadang, 66, retirado a security guard, pasahero iti immuna a bus, ti naireport a nadunor ti makannawan a paset ti rupana ket naitaray iti ospital.

Dua a suspek, da William Rogers Ramboanga Arellano ken Milwaukee Arellano Ablana, agpada a taga-Barangay San Clemente, ti inaresto dagiti polis ket napilaanda iti kaso a malicious mischief ken physical injury. (Tawid News).

Comments are closed.