Footer

Akusado iti 4 a kaso, ginandat a gudasen riding in tandem

BANTAY, Ilocos Sur – Di pay nabigbig dagiti nanggandat iti biag ti maysa nga akusado iti sumagmamano a kaso idi malem ti Septiembre 14.

Ngem kitkitaen dagiti kapolisan ditoy no adda pakainaiganan ti pannakapaltog ni Sonny Boy Quibilan y Bibit, 34, naasawaan, ken residente iti Barangay Bonifacio, Cabugao, Ilocos Sur kadagiti sangsanguenna a kaso iti korte ti Vigan City ken Cabugao.

Maipalagip a kalpasan ti panagpiansana, naruk-atan ni Quibilan iti provincial jail a masarakan iti Barangay Taleb ditoy nga ili idi agarup 4:10 ti malem ti nadakamat a petsa ngem idi makadanon iti national highway ti Honda TMX tricycle a naglugananda ken ti inana a nangsukon kenkuana, inobertekan ida ti motorsiklo a nagluganan dagiti suspek sa pinaputokan ti back rider ni Quibilan.

Nupay natiruan ti makannigid a takiagna, timmaray ni Quibilan a nagsubli iti provincial jail tapno agpaarayat.

Naglibas dagiti suspek a nagpaamianan.

Kinamat dagiti nagresponde a kameng ti ISPPSC a naidetalye iti provincial jail dagiti suspek ngem saanda a nakamatan dagitoy.

Segun ken ni Linda Quibilan y Bibit, 59, idi rimmuarda iti provincial jail, nadlawna ti dua a lalaki a nagkasakay iti Honda XRM a motorsiklo a simmaruno iti naglugananda a traysikel a minaneho ni William Christopher Esguerra, 34, ken kalugaranda iti Barangay Bonifacio, Cabugao.

Nupay saan a nabigbig dagiti suspek, mapapati a nakaaruat ti back rider iti light blue nga atiddog ti manggasna, nakuttong ken atiddog ti buokna.

Iti panagimbestiga ti SOCO team, nakarekobreda iti lima a kapsula, maysa a deformed slug, ken fragments ti caliber 45 iti crime scene.

Sumangsango ni Quibilan iti kaso nga attempted murder a naipababaen iti Criminal Case No. 5998-V iti Vigan City, 2 a kaso ti murder a naipababaen iti CC No. 3012-K ken 3013-K ken panaglabsing iti RA 10591 iti babaen ti CC No. 3263 iti korte ti Cabugao. (Tawid News)