Footer

SINURSURAN: Narigat met no Maminsan

Kolum ni Jobert M. Pacnis

KOMUSTA, SIR?

Nai-PM kenkuana iti Facebook.

Ket sineknan iti asi iti bagina. Ken asi kadagiti adalanda. Wen, nalabit, aglagawen dagiti ubbingna. Mano nga aldawen a di nagparang.

Ta ti ammona, kabaelanna a kitaen ti salun-atna. Dina ipalubos nga idagel ti sagubanit.

Isu ngarud a dina ab-abusuen ti bagina kadagiti bisio nga ammona a mangdadael laeng kenkuana– kangrunaan ti arak ken sigarilio.

Kinapudnona, iti aguppa-ten a dekadana, uray maysa a sigarilio, dina pay napadasan ti nagsusop. Dina ngamin mairusok ti agpayubyob ta nabangsit iti panagangotna.

Ken naipasagepsep kenkuana ti dakes nga epekto daytoy iti bagi. Isu a dina maawatan no apay nga adu latta dagiti indibidual a tagiimasenda ti sigarilio a kas bisio.

Iti laengen pagadalanda, nupay kasano ti kinaigetda a mangipawil kadagiti ubbingda nga agsigarilio, adu latta kadakuada ti saan a dumdumngeg. Aggatangda latta iti sigarilio kadagiti kantina a malabsanda iti panagawidda. Wenno agpayubyobda latta kadagiti nasamek a bangkag nga abay ti solar ti pagadalanda. Aglibasda kadagiti inaladan iti likud.

Nupay kasta, saanda latta a mammamingga a mangbagbaga kadagiti ubbingda kadagiti dakes nga ibunga ti sigarilio iti salun-at. Paset dayta ti akemda a kas maikadua a nagannak dagitoy nga ubbing.

Kenkuana, no mainum a nasanger ti mapagsasaritaan, sa laeng makalidok no adda ti panagsasarak ti grupoda maminsan iti makatawen. Nupay kasta, saan pay a makaibus iti sangabote a nasanger ta no napaanudanen bassit ti karabukobna, “matamaan” a dagus.

Kasta dagiti di naruam.

Angot pay laeng ti arak, mabarteken a kunada.

Pagyamananna ketdi ta maaw-awatan dagiti kagru-poanna. Ken sabagay, ti grupoda, saan met a grupo dagiti mangnginum. Pagsasanguanda laeng pangpaimas iti mapagpapatangan. Ken awan ti talaga a bartekero kadakuada. Para iti panagkakadua, kasta laeng. Inniliw ken kinnomusta laeng.

Nupay ad-adayoanna ti arak ken sigarilio a bisio, mabalin a saan nga umanay a mangiliklik kenkuana kadagiti nagduduma a sagubanit.

Agpayso, saan nga agsigsigarilio. Ngem saan met a mailibak a makaang-angot latta iti asuk nga agtaud itoy gapu kadagiti makapulpulapolna iti inaldaw. Segun pay met ngarud iti panagadal, mapan a 70% ti malang-ab nga asuk/kemikal kadagiti making-angot laeng idinto a 30% laeng kadagiti agsigsigarilio. Kayatna a sawen, dakdakkel pay ti tiansana a making-angot laeng a makaala iti sakit.

Ngem sabagay, saan nga amin a maipugso nga asuk ket malang-abna. Ti ketdi nalawag, makaala latta iti sakit a patauden ti sigarilio ta adu latta dagiti awan bibiangda iti aglawlaw no kasta a pumayubyobda.

Masdaaw man ketdi ta napirmaanen ti Pangulo ti pannakaipawil ti panag-payubyob kadagiti pampubliko a lugar iti sibubukel a pagilian ngem no apay nga adu latta dagiti aglablabsing.

Ken no apay a di maipatungpal dagiti maseknan nga ahensia.

Nagbalin ngarud a naannad iti bagina. Agingga iti mabalin, saan a makipulapol kadagiti agpaypayubyob. No ngarud kasta nga adda maimatanganna nga indibidual nga agsigsigarilio nga umasideg, wenno lumabas, iti ummong a yanna, dardarasenna ti lumiklik.

Ngem nasdaaw laengen iti panaglabas dagiti aldaw. Nakarikna iti karkarna. Bimmantot a bimmantot ti bagina.

Idi damo, impatona laeng a trangkaso. Kasano, nagsasaruno dagiti kaduana iti pagadalan a naglangan. Rasonda ti panagsakit ti susuopda ken kasda la gurigoren. Ipagnana ti trangkaso, kunada.

(Adda tuloyna)

Comments are closed.