Footer

4 polis, nayaspilian iti Medalya ng Papuri

SAN FERNANDO CITY – Uppat a polis ti nayaspilian iti medalia gapu iti nagsina a maipagpannakkel nga inaramidda babaen iti maysa a programa a naangay iti Police Regional Office 1 grandstand ditoy siudad idi Septiembre 18.

Mismo a ni Deputy Regional Director for Administration Chief Supt. Reynaldo G. Biay, kaduana ti Command Group, ti nangiyaspili iti medalia kada Police Inspector Andres T. Daquial IV, PO2 Ramon Christopher S. Diego ken PO2 Jay Joemar C. Corpuz manipud iti PPO Ilocos Norte ken SPO1 Noli L. Teope manipud iti PPO Pangasinan kabayatan ti flag ceremony a naangay idi agsapa ti nadakamat a petsa.

Naikkan da Daquial, Diego ken Corpuz iti Medalya ng Papuri kas pammigbig iti impamatmatda nga exemplary performance of duty bayat ti panangiwayatda iti buy-bust operation sadiay Barangay 2, San Andres, Bacarra, Ilocos Norte idi Hulio 21, 2017 a nagresulta iti pannakaaresto ni Arnel M. Reyes ken Norma Michelle V. Llacuna, agpada a residente iti nadakamat a lugar.

Nakakumpiska dagiti polis kada Reyes ken Llacuna iti 13 heat-sealed a sachet a nagkarga iti shabu nga agdagsen amin iti 61.1 grams, drug paraphernalia ken P1,000.00 a naaramat a marked money.

Iti sabali a bangir, naiyaspilian met iti Medalya ng Papuri ni Teope gapu iti panangisublina iti maysa a bag a naglaon iti kuarta ken napateg a dokumento a nasarakanna sadiay Poblacion, Urdaneta City, Pangasinan idi Agosto 23, 2017.

Madama ti panagpatrolia ni Teope kas paset ti SWAT Team iti nadakamat a lugar idi nakitana ti nabati a bag a naglaon kadagiti dokumento ken maysa a tseke manipud iti Land Bank of the Philippines nga aggatad iti P200,000.00.

Intunton ni Teope ti bag agraman dagiti dokumento ken kuarta iti akinkukua a naammuan idi agangay a maysa nga Elena Paasa. (Tawid News)