Footer

BANNER: Construction worker, kaduana a balo, ginudas riding in tandem

STO. DOMINGO, Ilocos Sur – Pimmusay iti ospital a nakaitarayanda ti maysa a construction worker ken ti kaduana a balo kalpasan a napaltoganda iti sanguanan ti kamposanto iti bisinidad ti Barangay Puerta Real, ditoy nga ili idi agsapa ti Septiembre 19.

Nabigbig dagiti biktima ti pammaltog a da Norman Tadios y Tabil, 34, naasawaan, ken residente iti Barangay Poblacion ditoy ken Susan Tano y Baldo, 48, balo, ken residente iti Barangay Nalasin, ditoy met laeng nga ili.

Saan pay a nabigbig dagiti pimmaltog kadakuada.

Iti inisial a panagimbestiga dagiti polis, agdaldaliasat nga agpaamianan iti national highway dagiti biktima a nakalugan iti Euro Sport motorcycle a minaneho ni Tadios idi pinaltogan ida dagiti suspek a naglugan iti di pay ammo a motorsiklo.

Naglibas dagiti suspek iti saan nga ammo a direksion.

Naitaray dagiti biktima iti Northside Doctor’s Hospital, Guimod, Bantay, Ilocos Sur ngem pimmusayda bayat ti pannakatamingda iti ospital gapu kadagiti sinagrapda a multiple gunshot wounds.

Iti panangproseso ti SOCO team a nakabase iti Ilocos Sur Provincial Police Office iti crime scene, nakarekobreda iti uppat a kapsula a mapapati a naiputok manipud iti cal. 45.

Saan pay nga ammo ti motibo ti pammapatay.

Kabayatanna, maob-obserbar iti nakaitarayanna nga ospital ti kasasaad ti maysa a tricycle driver a napaltogan Sitio Manganup, Barangay San Sebastian, San Vicente idi parbangon ti Septiembre 17.

Maipalagip nga agdaldaliasat ni Frederico Bisco y Ribuyaco, 53, naasawaan iti nasao a sitio idi agarup 1:00 ti bigat ti nadakamat a petsa idi inasitgan dagiti suspek a nakamotorsiklo ket maysa kadakuada ti nangpaltog iti biktims iti sumagmamano a beses a nagsagrapanna iti sugat iti makannigid a paset ti bagina.

Awan ti nasarakan ti SOCO team a kapsula wenno buli iti nakapasamakan ti krimen kasta met a di pay ammo ti klase ti paltog a naaramat.

Agtultuloy ti panagpalutpot ti kapolisan no ania ti motibo ti nasao a pammaltog. (Tawid News)

Comments are closed.