Footer

Constitution and By-Laws ti ISAGIO, naaprobaran

Ni Imelda Castro Rivero, PIA 1, Region 1

VIGAN CITY – Naaprobaran ti Constitution and By–Laws (CBL) ti Ilocos Sur Association of Government Information Officers (ISAGIO) kabayatan ti maysa a taripnong nga insayangkat ti Philippine Information Agency (PIA) ditoy itay nabiit.

Segun ken ni Leoncio Balbin Jr., presidente ti ISAGIO, addaan ti grupo iti maymaysa a panggep a mangipakaammo kadagiti impormasion a makatulong a mangpadur-as iti panagbiag dagiti umili iti probinsia.

Innayonna a babaen iti ISAGIO, mapapigsa ti responsable a pannakaiwaragawag iti publiko kadagiti programa, proyekto ken serbisio manipud iti lokal ken iti nasional nga ahensia ti gobierno.

Immuna ngem daytoy, naangay iti Provincial Capitol idi Agosto 18 babaen ti initiatibo ti Philippine Information Agency, Ilocos Sur Information Center ti panagtataripnong dagiti information officers wenno empleado ti gobierno a responsible iti pannakaiwaragawag dagiti programa, proyekto ken serbisio ti lokal ken nasional a gobierno tapno mapapigsa ti panagkikinnammayet dagiti adda iti lokal ken nasional a gobierno ket agtitinnulongda a mangiya-sideg kadagiti agindeg dagiti programa, proyekto ken serbisioda.

Kinuna ni Direktor Role a babaen kadaytoy kaunaan a panagtitipon dagiti information officers ti probinsia, mapapigsa ti grupoda, ket daytoy ti mangitunda iti panagprogreso iti probinsia.

Kinuna ni Governor Ryan Singson nga agdur-as ti probinsia no agkikinnammayet dagiti adda iti lokal ken nasional a gobierno.

Kalpasan a naaprobaran ti CBL, kinuna ni Freddie G. Lazaro, agdama a Deputy Regional Director ti PIA- Region 1, a mairehistro ti ISAGIO iti Securities and Exchange Commission (SEC) tapno maaddaan ti legalidad ti grupo nga agisayangkat kadagiti programa a mangpadur-as iti sistema ken epektibo a pannakaiyallatiw ti impormasion.

Naorganisar ti ISAGIO idi 2004 babaen iti panangiyussuat ti PIA tapno agbalin a maysa nga institusion ti grupo dagiti IOs ti gobierno.#