Footer

Kultura, tagipatgen, tradision ni Ilokano, naitampok iti 7th Ayat Festival

AGOO, La Union – Inyalat ti ili ti Sto. Tomas ti kampeonato iti streetdancing kas tampok a pabuya iti 7th Ayat Festival a naangay ditoy nga ili idi Septiembre 15.

Kas kampeon, inyawid dagiti street dancers ti Sto. Tomas ti P80,000 cash prize babaen ti insalipda a Daing Festival a nakipartisiparan dagiti estudiante manipud iti lima nga ili ken kakaisuna a siudad ditoy a probinsia ken nakaitampokan dagiti kultura, tagipatgen, ken tradision ti ilida.

Nangabak met ti Agoo ti maikadua a puesto ket inawatda ti P50,000.00 cash prize babaen ti Dinengdeng ti Festival idinto a maikatlo ti San Fernando City ket inyawidda ti P30,000.00 babaen ti Pindangan Festival.

Immawat iti sag-P20,000.00 a gunggona dagiti di nangabak a nakipartisipar iti nasao a pasalip a pakaibilangan ti ili ti Sudipen babaen ti Kawayan Festival, Aringay babaen ti Bangus Festival ken Bauang babaen ti Baggak Festival.

Iti mensahe ni Governor Francisco Emmanuel Ortega III a binasa ni Board Member Christian Rivera, inyunay-unayna a “maysa daytoy a selebrasion ti kultura ti Ilokano, tradision, ken tagipatgen, a mangpatapat ken mamagkanaig kadatayo amin.”

Kabayatanna, naiyussuat met ti elimination round ti La Union Henio a nakisalipan dagiti estudiante iti panagpugto kadagiti balikas nga Ilokano a napili babaen ti random.

Karaman pay kadagiti aktibidad ti Iskrabiloko, ay-ayam ti scrabble a nakausaran dagiti Ilokano a balikas, salip iti deklamasion, ken iti elimination round iti Ilokano Chorale a naangay idi Septiembre 19.

Maangay pay inton Oktubre 11 ti panaggibus ti Ayat Festival a pakaitampokan ti pannakaiwaragawag ti Kampeon ti Lengguahe ken nangabak kadagiti nadumaduma a pasalip.

Ti tema iti daytoy a tawen: “Sangsangkamaysa a panagpitik dagiti puso nga agay-ayat iti La Union”. (Tawid News, manipud iti report ni Joanna D. Sabado)

Comments are closed.