Footer

Mangngalap, naireport a mapukpukaw iti taaw

STA. MARIA, Ilocos Sur – Maysa a mangngalap ti naireport a mapukpukaw kalpasan a saan a naggawid manipud timmapog iti baybay idi aldaw ti Septiembre 15.

Inreport ni Gemma Dalgo y De Guzman, 49, fish vendor, ken residente iti Barangay Bia-o ditoy nga ili a mapukpukaw ti kabsatna a ni Flor De Guzman y Dayap, 33, naasawaan, a timmapog iti baybay idi agarup 11:00 ti bigat ti nadakamat a petsa ngem naammuan manipud iti kalugaranda a mangngalap a nasabuagan ti bangkana iti dalluyon idi aggawidda koman iti dayta met laeng a malem.

Kas maibatay iti salaysay Edgardo Dalgo, kadua ni de Guzman a timmapog iti baybay, aggawiddan a tumakdang idi agarup 6:00 ti malem idi sinabuagan ti dakkel a dalluyon ti bangka ni De Guzman a nakaigapuan ti pannakarakrak ken pannakalned daytoy.

Nangiwayat dagiti coast guard, MDRRMC volunteers ken kameng ti kapolisan ti Sta. Maria iti rescue operations ngem iti pannakaisurat daytoy, di pay nasarakan ni De Guzman a mapapati nga impataaw ti napigsa a koriente.#

Comments are closed.